Trump uron presidentin polak për rizgjedhje

Presidenti i Shteteve të Bashkuara, Donald Trump, e uroi homologun polak, Andrzej Duda, për sigurimin e mandatit të dytë presidencial në balotazhin e 12 korrikut.

“Përgëzime mikut tim, presidentit të Polonisë, Andrzej Duda, për rizgjedhjen e tij historike,” tha Presidenti Trump përmes rrjetit social Twitter duke shtuar:

“Pres të vazhdojmë punën tonë të rëndësishme në shumë çështje, përfshirë mbrojtjen, tregtinë, energjinë dhe sigurinë e telekomunikimeve.”

Komisioni Kombëtar Zgjedhor i Polonisë njoftoi dje se Duda i ka fituar zgjedhjet e së dielës me 51.03 për qind të votave.

Rivali i tij, kryetari i Varshavës, Rafal Trzaskowski, ka marrë 48.97 për qind të votave.

Duda është mbështetur nga Partia në pushtet për Ligj dhe Drejtësi.

Rezultati, raporton RFE, do të thotë se kjo parti dhe udhëheqësi i saj, Jaroslaw Kaczynski, do ta konsolidojnë tutje pushtetin dhe do të shmangin skenarët ku një president i opozitës do të kishte mundësinë e vetos në legjislacion.

Rezultati i zgjedhjeve do ta formësojë politikën e Polonisë së paku deri në vitin 2023, kur janë planifikuar zgjedhjet parlamentare.