Trupi i pajetë i Faton Hajrizit kthehet në Kosovë, MPJD: Po kryhen procedurat mjekoligjore

Ministria e Punëve të Jashtme dhe Diasporës, MPJD, ka bërë të ditur se trupi i pajetë i qytetarit të Kosovës, Faton Hajrizi, i raportuar si i vrarë në Lloznicë të Serbisë, ka mbërritur në Kosovë.

“Pas mbërritjes së trupit të pajetë të shtetasit të Kosovës, institucionet përkatëse të Republikës së Kosovës po kryejnë procedurat e mëtejshme mjeko-ligjore për identifikimin dhe verifikimin e tij,” thekson Ministria e Punëve të Jashtme dhe Diasporës përmes një njoftimi.

Edhe Avokati i angazhuar nga familja Hajrizi, Arianit Koci, tha se trupi i është dorëzuar Institutit të Mjekësisë Ligjore, prokurorisë dhe Policisë si dhe do të ketë ekzaminime shtesë.

Ndryshe, dje Ministria e Punëve të Jashtme dhe Diasporës njoftoi se Prokuroria e Qarkut të Beogradit kishte dhënë leje për tërheqjen e trupit të pajetë të Faton Hajrizit. Ky institucion tha se avokati i familjes Hajrizi, Arianit Koci, mbështetur nga Zyra Ndërlidhëse e Kosovës në Serbi, dhe ambasadori Jetish Jashari, po kryenin procedurat e tërheqjes së trupit të pajetë të shtetasit të Kosovës nga morgu i Lloznicës për t’u sjellë në Kosovë.

Faton Hajrizi u vra më 19 korrik në afërsi të kufirit mes Serbisë dhe Bosnjes, pasi u vu në ndjekje nga policia serbe si i dyshuar për vrasjen e një polic serb dhe ka plagosjen një tjetër më 18 korrik.

Faton Hajrizi u arratis nga burgu i Smrekonicës së Kosovës më 6 korrik.