Tubime qytetare, Kurti: Që ta ndalim hajninë, duhet ta largojmë qeverinë!

Lëvizja “Vetëvendosje” ka kërkuar sot dorëheqjen e Presidentit Hashim Thaçi dhe Kryeministrit Ramush Haradinaj duke i akuzuar për korrupsion ndërsa paralajmëroi tubime me qytetarë duke filluar që nesër më  5 Prill në Vushtrri:

“Kryeministrin dhe Presidentin e Kosovës i ndan taksa ndaj Serbisë por i bashkon korrupsioni në Kosovë. Ne kërkojmë dorëheqjen si të Presidentit, ashtu edhe të kryeministrit. Korrupsioni, papunësia e migrimi po rriten, kurse investimet, rendimentet dhe arsimi po bien. Mbi të gjitha, po shtohet hajnia e po zvogëlohet durimi,” tha Kryetari i Lëvizjes Vetëvendosje, Albin Kurti  i cili është dakord që të mbetet taksa, por kjo qeveri tha ai duhet të shkojë.

Nuk ka mbledhje të kabinetit që prej formimit të PAN Qeverisë ku nuk është marrë një vendim kundër interesit publik apo që përbën skandal: 
“Emëroi 23 ministra, mbi 80 zëvendësministra, 5 zëvendëskryeministra, e 35 këshilltarë, pa asnjë bazë të arsyeshme dhe në shpërfillje të nevojave e me shpërdorim të buxhetit. Kërcënoi ish prokurorin e vetëm që shprehu integritet profesional dhe guxim publik, Elez Blakajn. Bëri pazar me kriminelin, Milan Radojçiq, për formimin e qeverisë dhe pagoi 1 milion euro nga buxheti për serbët në veri që nuk paguajnë energjinë elektrike.”

Me këtë rast Albin Kurti i përmendi edhe mashtrimin më të madh që i bëri qytetarëve të Kosovës, Marrëveshjen e Demarkacionit, arsye kjo që Ramush Haradinaj erdhi në pushtet:

“I mashtroi qytetarët në Kosovë se do të korrigjonte marrëveshjen e Demarkacionit me Malin e Zi ndërsa ka falur 8.200 hektarë nëpërmjet ratifikimit në Kuvend. Premtoi se për 90 ditë qeverisje do të merret liberalizimi i vizave. Nuk e mbajti fjalën, sepse qysh në fillim ka gënjyer për këtë.”

Dhe jo vetëm kaq. Nënshkroi kontratën më të dëmshme në historinë e sektorit energjetik, atë me “ContourGlobal” që do ta rrisë çmimin e energjisë elektrike prej 45–80% dhe do ta zbraz buxhetin e shtetit; 53 milionë euro i dha Bechtel-Enkas në mënyrë të kundërligjshme; Emëroi anëtarë jokompetent në bordin e Trepçës dhe kompromentoi statutin e Trepçës; Emëroi kryeshef ekzekutiv të KEK-ut, Nijazi Thaçin, kushëririn e korruptuar të presidentit. E çoi drejt falimentimit Telekomin e Kosovës, tha kreu i Lëvizjes “Vetëvendosje”  duke mos harruar edhe dështimin e gjithanshëm në politikën e jashtme, çorientim institucional i qëndrimeve politike dhe skandale të njëpasnjëshme përballë partnerëve dhe aleatëve.

PANqeveria është PANhajnia. Që ta ndalim hajninë duhet ta largojmë qeverinë, tha Kryetari i Lëvizjes “Vetëvendosje” duke i bërë thirrje qytetarëve të marrin pjesë në tubimet qytetare në gjithë Kosovën:

“Me këto tubime nëpër komuna gjithandej Kosovës shkojmë bashkë drejt protestave qytetare dhe mocionit të mosbesimit në Kuvend që e largon këtë qeveri dhe mundëson zgjedhjet e parakohshme demokratike për ndryshimet e domosdoshme politike, ekonomike e shoqërore.”

Ndryshe, nesër tubimi me qytetarë, kundër PANhajnisë dhe për zgjedhje të reja zhvillohet në ora 14:00, në Sheshin “Adem Jashari”, në Vushtrri. Pasnesër, të shtunën, në ora 13:00, në Besianë (Podujevë), kurse në ora 15:00, në Mitrovicë. Për të vazhduar për çdo ditë anembanë nëpër qytetet e qytezat e Kosovës.