Tubimet e ndaluara, qytetarët protestojnë kundër qeverisë në Madrid

Qindra protestues kanë dalë në qendër të Madridit duke kërkuar dorëheqjen e qeverisë spanjolle ndonëse tubimet publike janë të ndaluara përderisa është në fuqi gjendja e jashtëzakonshme në Spanjë

Protestuesit shprehën pakënaqësi për mënyrën e qeverisës së Kryeministrit

Pedro Sánchez  me krizën e shkaktuar nga koronavirusi duke e konsideruar përgjegjëse për mbylljen e mijëra vendeve të punës.

“Dorëheqje, dorëheqje!” ishin thirrjet e qytetarëve në Salamanca ku protestuesit ishin dalë me tenxhere që i godisnin me lugë, në shenjë pakënaqësie.

Salamanca, që është një pjesë e qytetit me mirëqenie të mirë, u shndërrua në vatrën e protestave antiqeveritare në Spanjë. Ditëve të fundit, qytetarët kanë dalë çdo mbrëmje në orën 21 duke protestuar nëpër ballkonet e tyre, prej të hënës kanë zbritur në rrugë ndërkohë radhët e protestuesve po shtohen.

Protestuesit nuk kërkuan leje për protestë ndërkohë 13 personat për të cilët TV Cuatro tha se janë denoncuar nga policia për tubim të paligjshëm, i pret gjoba prej 601 euro.

Ndryshe, kjo është protesta më e madhe prej se është në fuqi gjendja e jashtëzakonshme, dhe ishte nën mbikëqyrjen e policisë me helikopter për gjatë gjithë kohës ndërkohë 15 furgonë policie ishin renditur para protestuesve.

Spanja me 229.540 të infektuar është vendi i dytë në Evropë pas Mbretërisë së Bashkuar me numrin e të prekurve me koronavirus ndërsa ka 27.320 të vdekur.

Gjendja e jashtëzakonshme është nga 14 marsi, kur 47 milionë spanjollë u mbyllën për 50 ditë në shtëpitë e tyre. Të dhënat zyrtare flasin se përhapja ditore ra nën 1 për qind, dhe dje ishte vetëm 0.22 për qind. Para dy javësh, qeveria lehtësoi masat dhe në Madrid si njërin ndër qytetet më të goditura, u lejua dalja 1 orë për shëtitje ose aktivitet sportiv, kohë të cilën banorët e Salamancës e shfrytëzuan për protesta