Turizmi në 2025, rritja ngadalësohet ndjeshëm
Turizmi në vitin 2025 ka shënuar një ngadalësim të ndjeshëm të rritjes në raport me vitin paraardhës.
Pavarësisht se shifra shënoi 12.46 milionë hyrje të të huajve me një rritje prej 6.6 për qind krahasuar me vitin 2024 ajo që bie në sy është një ngadalësim i ritmit.
Në vitin 2024 kjo rritje ishte 15.2 për qind. Të dhënat e publikuara nga Instituti i Statistikave mbi lëvizjen e Shtetasve për muajin dhjetor tregojnë tashmë qartë panoramën.
“Gjatë muajit Dhjetor 2025, rezultojnë të kenë hyrë, në territorin e Republikës së Shqipërisë, 1.542.889 shtetas shqiptarë dhe të huaj.
Ky tregues ka pësuar një rritje me 7.0 për qind, krahasuar me Dhjetor 2024. 1.353.137 shtetas shqiptarë dhe të huaj rezultojnë të kenë dalë nga territori i Republikës së Shqipërisë, duke shënuar një rritje me 8.1 për qind, krahasuar me të njëjtën periudhë të një viti më parë.
Në Dhjetor 2025, numri i shtetasve shqiptarë që kanë hyrë në territorin shqiptar është 844.147, duke pësuar një rritje me 7.1 për qind, krahasuar me Dhjetor 2024. Numri i shtetasve të huaj që kanë hyrë në territorin shqiptar është 698.742. Ky numër është rritur me 6.8 për qind, krahasuar me të njëjtën periudhë të vitit 2024”, thuhet në publikimin e INSTAT.
Daljet e shtetasve
Sipas INSTAT në muajin Dhjetor 2025, 714.457 shtetas shqiptarë numërohen të kenë dalë nga territori i Shqipërisë, duke shënuar rritje me 10.6 për qind, krahasuar me Dhjetor 2024.
“Daljet e shtetasve të huaj nga territori i Shqipërisë gjatë muajit Dhjetor 2025 janë 638.680. Krahasuar me të njëjtën periudhë të një viti më parë, ky tregues është rritur me 5.5 për qind
Në Dhjetor 2025, 97 për qind e hyrjeve të shtetasve të huaj në Shqipëri janë nga rajoni i Evropës. Evropa Jugore zë 85 për qind të hyrjeve të shtetasve të huaj nga kontinenti Evropian, ndjekur nga Evropa Perëndimore me 6 për qind dhe Evropa Veriore me 4 për qind,” vlerëson INSTAT.
Turizmi në 2025 dhe pritshmëria
Viti 2025 nisi me një pritshmëri optimiste të turoperatorëve për një vit të suksesshëm por ato u zbehen muaj pas muaji duke u dukur qartë në fillim të verës.
Konkretisht në atë kohë operatorët theksuan se rritja e çmimeve në disa rajone, zhvlerësimi i euros kundrejt lekut si dhe problemet bazike që u shfaqën kryesisht gjatë verës po e bënin Shqipërinë më pak atraktive.
Italianët edhe pse prezentë gjatë verës e ulën ritmin e vizitave, Kosova gjithashtu duke u përqendruar kryesisht në pjesën Verioret ë vendit ndërkohë që mungesa e ujit në Golem apo energjisë dhe djegia e mbetjeve në pjesën e Jugut u bë një tjetër arsye për vlerësime negative.
Pavarësisht këtyre zhvillimeve Shqipëria arriti të mbajë një rritje të moderuar si efekt i ecurisë së mirë të tureve kulturore gjatë pranverës dhe verës diçka që është nënvizuar si pozitive nga turoperatorët.
Për këtë vit ata janë treguar më të rezervuar në parashikime duke nënvizuar se tendenca e rritjes do të jetë e ngjashme me vitin që kemi lënë pas por ka nevojë për reflektim dhe për të marrë masa urgjente në përmirësim të infrastrukturës dhe shërbimit në mënyrë që kjo rritje edhe pse e moderuar të jetë e qëndrueshme./Monitor/
