Turizmi në Shëngjin, Basha: As 10% e strukturave hoteliere s’është rezervuar!

Pas takimit me operatorë turistikë dhe sipërmarrës në Shëngjin, Kryetari i Partisë Demokratike, Lulzim Basha, konstaton një situatë shumë të rënduar ku as 10% e strukturave hoteliere nuk kanë rezervime ndërsa pjesa më e madhe e bareve dhe restoranteve po punojnë me 30-40% të kapaciteteve.

“Dështimi i Ramavirusit për marrjen e masave për të kryer testimet e nevojshme në mënyrë që të identifikoheshin dhe izoloheshin vatrat e të infektuarve me COVID-19, ka sjellë këtë situatë në vend, ku për shkak të numrit të lartë të të infektuarve, numrit të ulët të testimeve dhe situatës së rëndë ekonomike, BE refuzoi hapjen e kufijve me Shqipërinë. Kjo do të thotë më pak turistë, më pak të ardhura, më pak të punësuar,” tha Lulzim Basha duke rikujtuar se Edi Rama refuzoi ta dëgjojë thirrjen e eskpertëve të Partisë Demokratike për strategjinë e hapjes:

“Në vend që paratë të shkonin për ekonominë dhe për të blerë kite testuese, i pagoi ato për tendera dhe koncesione korruptive. 1 milion euro janë dhënë me një firmë për inceneratorët, ndërkohë që këto para mund të përdoreshin për t’i dhënë një shtysë sektorit jetik të turizmit.”

Strukturat hoteliere, baret dhe restorantet përveç mungesës së turistëve, thekson lideri i opozitës pas takimit me biznesit në Shëngjin, po përballen dhe me taksa e tarifa të rritura, me dyfishimin e faturave të energjisë, ujit dhe me tatimorët, që në këtë kohë krize janë vërshuar si bandë mbi biznesin. Sepse strategjia e vetme e Ramavirusit është: Merr nga biznesi i ndershëm dhe qytetarëve dhe jepja një grushti oligarkësh.

“Ne kemi një vend të mrekullueshëm. Në Lezhë si në pak vende të tjera, ndërthuret trashëgimia historike e kulturore me natyrën e mrekullueshme, duke e bërë një destinacion të preferuar për turistët. Problematikat janë të shumta, por kur ka vullnet dhe dëshirë, ka gjithmonë zgjidhje,” tha Kryetari i Partisë Demokratike, Lulzim Basha, pas takimeve që zhvilloi në Shëngjin duke u zotuar para operatorëve turistikë dhe sipërmarrësve.

“Ne do të vendosim prioritetet e duhura. Duke nisur me uljen e taksave dhe tarifave, orientimin e investimeve drejt sektorëve të rëndësishëm, duke hequr taksën “Rama” mbi karburantin dhe ndihmuar me subvencione sektorët e rëndësishëm që janë dhe furnizuesit e sektorit te turizmit, siç është bujqësia, peshkimi etj.”