Turqi, Ministri i Brendshëm jep dorëheqje për shkak të orës policore

Ministri i Brendshëm i Turqisë, Suleyman Soylu, ka dhënë sot dorëheqje pas kritikave për orën policore që vendosi papritur gjatë fundjavës dhe zuri në befasi miliona njerëz.

Soylu  në deklaratën e dorëheqjes theksoi se merr përgjegjësinë për orën policore e cila u vendos të premten në 31 qytete të Turqisë.

“Të më falin, kombi im, të cilën kurrë nuk kam dashur ti bëjë dëm, si dhe presidenti ynë, të cilit do ti jem besnik gjatë gjithë jetës. E lë postin e ministrit të brendshëm të cilin kisha nderin ta kryej,” thekson Suleyman Soylu në tekstin e dorëheqjes.

Ndryshe, të premten në Turqi u paralajmërua ora policore nga mesnata deri të dielën në mesnatë. Mirëpo, ndalim qarkullimi u shpallë vetëm dy orë para se të hyjë në fuqi ora policore, arsye kjo që detyroi turma njerëzish ti drejtohen dyqaneve duke injoruar masat tjera kundër përhapjes së virusit.

Për shkak të vendimit të papritur që krijoi tollovi të mëdha, opozita kritikoi qeverinë. Soylu e pranoi se nuk e kishte parashikuar blerjen nën panik, por tha se nuk beson se tollovitë në dyqane gjatë blerjeve ishin problem.