Turqi, të dielën zhvillohen zgjedhjet presidenciale dhe parlamentare

Të dielën, më 24 qershor, në Turqi zhvillohen zgjedhjet presidenciale dhe ato parlamentare. Këto janë zgjedhjet e para pas miratimit të sistemit presidencial të qeverisjes me referendumin e 16 prillit të vitit 2017.

Sipas Komisionit të Zgjedhjeve të Turqisë, 56 milionë e 300 mijë votues do të shfrytëzojnë të drejtën e tyre në 180.065 kuti votimi në Zgjedhjet Presidenciale dhe Parlamentare.

Këto zgjedhje karakterizohen me një numër risish, siç janë “kutia mobile e votimit”, kandidatura presidenciale me 100 mijë firma të mbledhura, mbajtja e zgjedhjeve presidenciale dhe parlamentare në të njëjtën ditë, si dhe aleancat parazgjedhore mes partive për herë të parë në historinë politike të Turqisë

Në këto zgjedhje, për herë të parë votuesit në të njëjtën kohë do të zgjedhin presidentin e shtetit dhe deputetët në Parlamentin e Turqisë. Në vend të 550 deputetëve, votuesit do të zgjedhin 600 deputetë. Në këtë mënyrë, u ndryshua edhe numri i deputetëve në disa provinca

Në garën për presidenti janë gjashtë kandidatë. Presidenti aktual Rexhep Tajip Erdogan është kandidat i përbashkët i Aleancës Popullore, e cila përbëhet nga Partia e Drejtësisë dhe Zhvillimit dhe Partia e Lëvizjes Nacionaliste. Kandidat i Partisë Republikane Popullore është Muharem Inxhe, kurse Partia Demokratike e Popujve ka nominuar Selahatin Demirtaş

Në këto zgjedhje garon edhe Meral Akshener, kryetarja e Partisë Iji, e cila u kandidua duke mbledhur 100 mijë firma.

Ndërkohë, kryeministri i Turqisë, Binali Jëlldërëm, tha se Qeveria e tij për një muaj të tërë ka marrë masat e duhura që zgjedhjet presidenciale dhe parlamentare të mbahen në atmosferë të qetë dhe të sigurt.