Turqia heq dorë nga blerja e avionit luftarak rus SU-57
Turqia ka braktisur planet për blerjen e avionëve luftarak rus Su-57, duke arritur marrëveshje me Britaninë e Madhe për modernizimin dhe finalizimin e projektit për prodhimin e avionë luftarak turk TF-X.
Britania e Madhe ka mbështetur Turqinë në planet e saja për zhvillimin e avionit luftarak turk të gjeneratës të pestë. Kompania britanike e hapësirës ajrore “BAE System” po merr pjesë në projektin e prodhimit të avionit luftarak turk. Sipas raporteve, Britania e Madhe pas largimit nga Bashkimi Evropian është duke shikuar që të forcoj rolin e saj në zhvillimet globale.
Roli i Britanisë së Madhe në mbështetjen e Turqisë për krijimin e avionit luftarak TF-X, shihet si përpjekje për të parandaluar blerjen e avionëve luftarak rus. E gjithë kjo vjen në kohën kur Greqia tani më ka arritur marrëveshje me Francën, për blerjen e avionëve luftarak francez Rafaelo, në kohën kur ka rritje të tensioneve në mes të Turqisë dhe Greqisë.
Tërheqja e Turqisë nga planet për blerjen e Su-57, në Rusi po shihet si një dështim i radhës i projektit rus për krijimin e avionit të gjeneratës së pestë Su-57.
Kohëve të fundit në mediat që përcjellin zhvillimin e avionëve të gjeneratës së pestë, ka pasur lajme që avioni rus Su-57, nuk i plotëson kërkesat e avionëve të gjeneratës së pestë dhe bazuar në vlerësimin e ekspertëve ai është aeroplan i gjeneratës së katër.
Në lidhje me rangimin e avionit rus Su-57, analistët Ryan Bauer dhe Peter Wilson, në një artikull për organizatën hulumtuese “RAND”, kanë deklaruar se avioni luftarak rus Su-57, bazuar në vlerësimin e performancës dhe problemeve të shumta teknike, nuk është avion i gjeneratës së pestë, ashtu siç e ka renditur Rusia, por avioni i gjeneratës së katërt.
Projekti i prodhimit të avionit luftarak rus Su-57 ka filluar në vitin 2002 dhe deri me tani nuk është arritur që të finalizohet dhe të fillohet me prodhimin serik. Gjatë fazave testuese avioni Su-57 është përballur me shumë problem teknike, të cilat kanë ndikuar që ende të mos filloj prodhimi serik, çka edhe e ka dobësuar flotën ajrore ruse e cila ka vite që është në pritje të furnizimit me avionët luftarak Su-57.
