Turqia lëshon fletarrestime për dhjetëra zyrtarë të Stambollit

Autoritetet turke kanë lëshuar 47 fletarrestime për zyrtarët e Bashkisë së Stambollit, kryetari i së cilës, rivali kryesor politik i presidentit Recep Tayyip Erdogan, është në burg që nga muaji mars.

Fletarrestimet bazohen “në katër hetime të ndara për korrupsion në Stamboll”, raportoi Agjencia shtetërore e lajmeve, “Anadolu”, pa dhënë informacione se sa njerëz janë paraburgosur.

Arrestimi më 19 mars i kryetarit të Stambollit, Ekrem Imamoglu, nxiti protestat më të mëdha në Turqi në dekadat e fundit.

Policia turke veçse ka arrestuar pothuajse 70 persona në bastisjet që ndodhën lidhur me dyshimet për korrupsion në Bashkinë e Stambollit. Në mesin e të arrestuarve janë edhe sekretari privat i Imamoglut dhe roja e tij private.

Sipas “Anadolu”, fletarrestimet e fundit shënjestrojnë një ish-ligjvënës opozitarë dhe pesë kryetarë të qarqeve të Stambollit.

Televizioni privat, Halk, që shihet si e afërt me Partinë Popullore Republikane, CHP, të Imamoglut, tha se kryetarët e nëntë qarqeve – nga 39 qarqe gjithsej – janë arrestuar dhe po mbahen në paraburgim.

CHP, që e ka nominuar Imamoglun si kandidat për zgjedhjet presidenciale të vitit 2028, nuk ka komentuar ende për fletarrestimet e fundit./RFE/