Turqia nis operacionin ushtarak në verilindje të Sirisë

Turqia dhe aleatët e tij rebelë sirianë kanë nisur operacionin e tyre ushtarak në verilindje të Sirisë, tha presidenti turk, Recep Tayyip Erdogan duke saktësuar se kjo ofensivë synon të eliminojë korridorin e terrorit përgjatë kufirit jugor të Turqisë.

Erdogan tha se ofensiva e ashtuquajtur “Operacioni Pranvera e Paqes”, ka për qëllim eliminimin e kërcënimit që vjen nga milicia e kurdëve sirianë dhe militantëve të grupit ekstremist, Shteti Islamik, raporton RFE.

Erdogan tha se kjo ofensivë synon edhe të mundësojë kthimin e refugjatëve sirianë pas formimit të zonave të sigurta në këtë pjesë.

“Misioni ynë është që të parandalojnë krijimin e një korridori të terrorit përgjatë kurfirit jugor, si dhe të ofrojmë paqe në këtë zonë,” tha Erdogan përmes një postimi në rrjetin social, Twitter duke shtuar:

“Ne do ta ruajmë integritetin territorial të Sirisë dhe të çlirojmë komunitetet lokale nga terroristët.”

Milicia kurde, e njohur si grupi YPG ka luajtur rol të rëndësishëm në mposhtjen e Shtetit Islamik në Siri.

Turqia e konsideron këtë grup si pjesë të Partisë së ndaluar të Punëtorëve të Kurdistanit, e cila ka luftuar për autonominë kurde brenda Turqisë për tri dekada me radhë.

YPG-ja e mohon çdo lidhje të drejtpërdrejtë organizative me Partinë e Punëtorëve të Kurdistanit.

Ndryshe, forcat amerikane të hënën kanë nisur të tërhiqen nga zonat përgjatë kufirit të Sirisë me Turqinë, pasi Shtëpia e Bardhë ka njoftuar se do të distancohet nga operacioni i planifikuar turk kundër forcave kurde në verilindje të Sirisë.

Sipas disa njoftimeve, forcat amerikane janë tërhequr tashmë nga dy postblloqet e vëzhgimit në Tel Abjad dhe Ras al-Ain.