Turqia nuk e jep pastorin amerikan, madje Erdogan kërcënon Presidentin Trump

Bazuar në deklaratat e sotme, Presidenti i Turqisë, Rexhep Taip Erdogan, nuk është i gatshëm të heq dorë nga dënimi me burg i pastorit amerikan, Andrew Brunson përkundër kërcënimeve nga SHBA me sanksione.

“Në vend se të rrespektojnë vendimin e gjykatës, SHBA flet për sanksione,” tha Erdogan para gazetarëve, raporton sot gazeta Haberturk. Dhe jo vetëm kaq! Erdogan merr guximin edhe të kërcënoj presidentin e SHBA.

“SHBA nuk duhet të harrojnë se në rast se nuk ndryshojnë sjellje, do të humbin një partner të fortë dhe të sinqertë, ” tha Erdogan.

Me këtë rast presidenti turk përgënjështroi zërat mbi marrëveshjen për rastin Brunson.

Gjykata turke gjatë kësaj jave ka vendosur që për shkaqe shëndetësore Brunson të zhvendoset në arrest shtëpie në qytetin e Izmirit.

Pastori i arrestuar 50 vjeçar, Andrew Brunson në dhjetorin e vitit 2016, është njëra ndër çështjet e shumta që tensionojnë marrëdhëniet e Ankarasë dhe  Washingtonit, aleatë të NATO-s të cilët në fillim të këtij viti në Siri ishin në prag të konfliktit.

Pastori, i cili mund të dënohet me 35 vjet burg, regjimi i Erdoganit e akuzon për terrorizëm dhe spiunim për llogari të dy organizatave që i konsideron armiqësore: rrjetit të Fethullah Guelen, të cilin Ankaraja e akuzon për organizimin e grusht shtetit në vitin 2016, gjë e cila nuk pranohet nga Guelen, dhe separatistëve kurdë në partinë kurde, PKK.

Donald Trump ka kërcënuar Turqinë  me “sanksione të mëdha” nëse nuk liron pastorin amerikan. Ndërkohë Zv/presidenti SHBA, Mike Pence sot ka përsëritur kërcënimin me sanksione.

“SHBA janë të gatshme ti vendosin sanksione Turqisë deri në lirimin e Andrew Brunson,” tha Pence për televizionin Fox News duke shtuar:  “Pastori Andrew Brunson është i pafajshëm”.

Zv/presidenti Pence tha se zhvendosja e Brunson në arrest shtëpie nuk mjafton  dhe ai duhet të lejohet të kthehet në SHBA.