Tusk: Nuk braktiset “ëndrra”, Britania mund ta kthejë pas kursin e saj

Liderë francezë dhe gjermanë kanë sinjalizuar se nuk kanë vullnet për të ofruar një zgjatje tjetër të afatit të fundit për Brexit. Por në përshkrimin e samitit të javës së kaluar të BE për Brexitin, Donald Tusk tha se askush nuk duhet ta braktisë “ëndrrën” se Britania e Madhe mund ta kthejë pas kursin e saj. Ai kërkoi nga politikanët e BE që të mos japin nxitje për një dalje të shpejtë të Britanisë thjesht nga rraskapitja.

“Në këtë moment të vështirë në historinë tonë, na nevojiten ëndërrimtarë dhe ëndrra. Ne nuk mund t’i dorëzohemi fatalizmit. Të paktën unë nuk do të ndaloj së ëndërruari për një Evropë më të mirë dhe të bashkuar”.
Tusku nuk përmendi me emër liderë të caktuar, por Presidenti francez Emmanuel Macron e bëri të qartë në samit se preferonte që t’i jepte vetëm pak javë Britanisë së Madhe për t’i mbyllur negociatat, në dallim nga gjashtë muajt, që iu dhanë.

Brexit nuk mund ta zgjasësh për një dekadë

Ministri i Jashtëm i Gjermanisë, Heiko Maas theksoi të martën se Britania e Madhe nuk duhet të presë që t’i jepet një shtyrje tjetër. Ai tha se çdo kërkesë e tillë do të lexohet si dëshirë për të qëndruar në BE.
“Në tetor ata duhet të vendosin se çfarë duan”, i tha Maas gazetës Financial Times duke shtuar: “Brexitin nuk mund ta zgjasësh për një dekadë”

Në aluzion për situatën absurde të Britanisë, kur ajo po përgatitet të paraqesë kandidatë për zgjedhjet e ardhshme të Parlamentit Evropian, Maas tha:

“Vetëm mendo për këtë: thua se do të largohesh nga Evropa dhe pastaj ti mban zgjedhje për Parlamentin Evropian”

Por Presidenti i Komisionit Evropian Jean-Claude Juncker megjithatë tha se është në dorën e Britanisë se kur duhet të largohet nga BE. Por shtoi se nuk pret që qeveria britanike ta ndryshojë kursin.

Jean-Claude Juncker gjithashtu propozoi që para afatit të 31 tetorit, 27 shtetet e tjera të BE të ruajnë të drejtën të takohen pa e ftuar Britaninë e Madhe./DW/