U denoncua nga “Hakmarrja për Drejtësi”, KPK konfirmon gjyqtarin

Komisioni i Pavarur i Kualifikimit, KPK, ka konfirmuar sot në detyrë Gjyqtarin e Apelit për Krime të Rënda, Dhimitër Lara. 

Pas hetimit në të tri kriteret, KPK ka vendosur sot që gjyqtari Dhimitër Lara të konfirmohet në detyrë.

Në lidhje me kriterin e pasurisë, Inspektorati i Lartë i Deklarimit dhe Kontrollit të Pasurisë dhe Konfliktit të Interesit kishte dorëzuar një raport pozitiv për gjyqtarin. Ndërkohë, në lidhje me aftësitë profesionale, sipas raportit të KLD-së, por edhe verifikimeve të Komisionit, nuk kanë rezultuar problematika në pesë dosjet e shortuara dhe në ato tri të përzgjedhura nga vetë ai.

Relatorja u shpreh se nga 5 denoncime të kryera prej publikut, është veçuar një prej tyre që është kryer nga shtetasit Orik Shyti dhe Laert Shyti, që sipas tyre janë akuzuar padrejtësisht si anëtarë të organizatës “Hakmarrja për Drejtësi”. Sipas KPK, denoncuesit kanë pretenduar se gjyqtari është korruptuar politikisht dhe se ka probleme me aftësitë profesionale. Në lidhje me këto, por edhe me gjetje të tjera, gjyqtari Lara tha se nëse do të kthehej pas, nuk do bënte asgjë ndryshe.