U padit në GJKKO, Veliaj: Halli i vetëm i Lulit është të sqarojë nëse ka 4 apo 5 vila!
Sot nuk u paraqit pranë Gjykatës së Posaçme, GJKKO, ku u zhvillua seanca e radhës ndaj Erion Veliajt të cilin Kryetari i PD, Lulzim Basha, e ka paditur për shpifje, por Kryetari i Bashkisë së Tiranës, Erion Veliaj nga Kombinati sërish akuzoi liderin e opozitës duke theksuar se teksa halli i vetëm i Bashës është që të sqarojë në gjyq nëse ka katër apo pesë vila, ai duhet të merret dhe të zgjidhë hallet e njerëzve.
“Përpara se të flisja më shkroi një gazetar e më pyeti: Nuk je te ky gjyqi për vilat e katërta dhe të pesta të Lul Bashës? I thashë: Nuk kam kohë unë për këtë punë. Unë dhe Beni merremi të bëjmë shtëpitë për njerëzit. Se ka katër apo ka pesë vila Lul Basha të shkojë ta sqarojë në gjykatë se nuk kemi kohë për të humbur. Këta kanë vetëm hallin e tyre. Luli u çua sot dhe e vetmja gjë që kishte në axhendë është të sqarojë në gjykatë ka katër apo pesë vila. Për këtë jemi në gjyq. Shih çfarë hallesh kanë këta,” tha Erion Veliaj nga Kombinati ku përuroi qendrën e re komunitare “Të qëndrojmë së bashku” duke akuzuar gjithçka demokrate:
“Këta zihen për foltoren, për sondazhe se kë mbështesin më shumë, Saliun e lodhur apo Lulin e përgjumur? Këta nuk kanë lidhje fare me realitetin tonë. Këta për kalamajtë tanë nuk duan t’ia dinë. Këta nuk dua t’ia dinë fare, sepse e kishin këtë bashki, e kishin këtë qendër dhe nuk u dukën njëherë.”
Ndryshe, Kryetari i Partisë Demokratike, Lulzim Basha është paraqitur sot në Gjykatën e Posaçme, për seancën e radhës ndaj Kryetarit të Bashkisë Tiranë, Erion Veliaj, të cilin e akuzon për shpifje, pasi Gjykata e Lartë njoftoi se GJKKO është kompetente për shqyrtimin e të gjitha akuzave penale të ngritura ndaj një zyrtarëve të lartë, por kryebashkiaku nuk u shfaq.
