U qëllua me armë zjarri në fushatë elektorale, ndërron jetë Ish-Kryeministri i Japonisë

Ish-Kryeministri i Japonisë, Shinzo Abe, ka ndëruar jetë pasi u qëllua me armë zjarri gjatë një fushate elektorale në qytetin Nara afër Osakas.

Mbi trupin e Shinzo Abe, 67 vjeç, u qëllua me dy plumba, raporton televizioni japonez NHK, ndërsa sulmuesi u arrestua në vendin e ngjarjes.

“Sipas një zyrtari të lartë të LDP-së, Ish-Kryeministri ndërroi jetë në një spital në Kashihara, rajoni Nara, ku po merrte trajtim mjekësor,” raportoi NHK dhe duke referuar po këtij burimi thekson se sulmuesi është identifikuar si Tetsuya Yamagami, 41 vjeç. Ai deklaroi para policisë se ishte i pakënaqur me Shinzo Aben dhe donte ta vriste.

“Cilado qoftë arsyeja, një akt i tillë barbar nuk mund të tolerohet kurrë dhe ne e dënojmë ashpër atë,” tha Sekretari i kabinetit të Kryeministrit japonez, Hirokazu Matsuno.

Ndryshe, Shinzo Abe ishte kryeministri më jetëgjatë i Japonisë. Ai ka shërbyer për një vit më 2006 dhe më pas nga viti 2012 deri më 2020 kur dha dorëheqje për arsye shëndetësore. Abe u pasua nga aleati i tij i ngushtë i partisë, Yoshihide Suga, i cili më vonë u pasua nga Fumio Kishida.