U sinjalizua nga ambasada e SHBA, bllokohet anija cisternë me mbi 1 ton drogë

Një anije cisternë e mbushur me kanabis është kapur në det, teksa ishte nisur nga Bejruti për në Portin e Pireut me destinacion final Libi. Mësohet se në mjetin lundrues kishte mbi 1.2 tonë kanabis, që kapte vlerën e mbi 15 milionë euro, nëse shitej në treg.

Anija cisternë, raporton BW, është zbuluar pas informacioneve të dhëna nga sektori i antidrogës në Ambasadën Amerikane, në Greqi, ndërsa mësohet se lënda narkotike ishte përpunuar në Portin e Pireut, në vendin fqinj.

Siç raportojnë mediat greke, kanabisi ishte fshehur në qeska të tejdukshme, në pure hurmash arabe. Anija cisternë ishte nisur nga Bejruti dhe kishte mbërritur në Portin e Pireut më 4 janar, ndërsa kishte si destinacion final Libinë.