U vetëdorëzua/ Gjykata, vendimi për administratorin e “Gega Oil”
Gjykata e Tiranës ka caktuar masën e sigurisë “detyrim për t’u paraqitur” kundrejt garancisë pasurore për administratorin e Gega Oil, Paulin Gegën.
Paulin Gega u shpall në kërkim më 10 Gusht nga policia me urdhër të Prokurorisë së Tiranës dhe mësohet se ai është vetëdorëzuar ditën e mërkurë.
Pak pasi policia e Shtetit njoftoi zyrtarisht se ka shpllaur person në kërkim administratorin e Gega Oil, ky i fundit ka reaguar për lajmin, duke bërë me dije se e ka mësuar gjithçka përmes mediave ndërsa ai ndodhet në Greqi për pushime së bashku me familjen.
“Jemi nisur për pushime verore në Greqi, më datë 09.08,2019, pushime të cilat janë rezervuar rreth dy muaj më parë të një agjenci turistike në rrugën Fortuzi, Tiranë, ku dhe mund ta verifikoni fare lehtësisht,” tha Administratori i “Gega Oil”, Paulin Gega për “News 24”, ndërsa për akuzat e policisë, për të cilat është shpallur edhe person në kërkim ai thotë:
“Kompania jonë nuk ka kryer asnjë shkelje apo kundravajtje penale as në aspektin evaziv apo të të ashtuquajturës ‘Fshehje e të ardhurave apo të pasurisë,” tha Gega duke shtuar se aktiviteti i kësaj kompanie do të vazhdoj pa ndërprerje në të gjithë Shqipërinë.
Gjatë seancës për masën e sigurisë, Paulin Gega u përfaqësua nga avokati Artan Hajdari, ndërsa përfaqësues i akuzës ishte prokurori Kolë Hysenaj.
Ndryshe, më 10 Gusht, Policia e Shtetit në bashkëpunim me organet tatimore bënë të ditur se ka ndjekur veprimtarinë e tatimpaguesit « Gen Klaudis ShA », në vijim të zbatimit të Planit të Masave kundër Informalitetit dhe Evazionit Fiskal në sektorët e Turizmit, Ndërtimit, Hidrokarbureve, Tregtimit të mallrave me akcizë, dhe ka ushtruar kontroll në datën 07.08.2019.
Nga kontrolli tatimor janë gjetur pompa, të cilat në shkelje të ligjit, funksiononin në regjim manual dhe për këtë arsye, është kryer bllokimi i tregtimit të karburantit nga ky subjekt.
Menjëherë pas bllokimit, u kryen hetime intensive që çuan në konkluzionin se administratori i kompanisë, shtetasi Paulin Gega, përmes subjektit “Gen Klaudis Sha” që njihet me emrin tregëtar “Gega Oil”, ka kryer evazion fiskal në përmasa të konsiderueshme.
Po ky shtetas është proçeduar katër vjet më parë nga Drejtoria e Policisë Shkodër, për veprën penale fshehje e të ardhurave.
Pas veprimeve të saj hetimore, Policia e Shtetit i referoi në Prokurorinë e Rrethit Gjyqësor Tiranë, materialet në ngarkim të shtetasit Paulin Gega.
Prokuroria nxorri një urdhër ndalimi për këtë shtetas, i cili rezultoi se është larguar nga vendi në dt.09.08.2019 .
Shtetasi Paulin Gega u shpall në kerkim për veprat penale “Fshehja e të ardhurave” , “Ndryshimi në aparatet matëse” dhe “Pastrimi i produkteve të veprës penale”.
