Udhëzim për strukturat e PD/ Pa politikë, Basha: Të gjithë pranë njerëzve…

Pas tërmetit tragjik të 26 Nëntorit që goditi Shqipërinë me magnitudë 6.4 të shkallës Rihter ku mbetën të vdekur 49 persona dhe mijëra njerëz pa kulm mbi kokë, Kryetari i Partisë Demokratike, Lulzim Basha, duke ngritur grupet e koordinimit për 6 zonat e prekura më rëndë nga tërmeti ka lëshuar një udhëzim për strukturat e PD.

Duke kërkuar intensifikimin e pranisë në terren të Grupit Parlamentar të PD, Kryesisë dhe Sekretariatit të Përgjithshëm ka urdhëruar në veçanti shmangien e daljeve publike dhe përdorimit politik të fatkeqësisë.

 “Të takojmë qytetarët e prekur nga tërmeti, të evidentojmë çfarë nevojash kanë, dëmet e shkaktuara në banesa, të përpiqemi t’u vijmë në ndihmë me çfarë të mundemi,“ thekson Lulzim Basha në udhëzimin me mesazhin kryesor siç e ka karakterizuar edhe vetë Kryetarin e PD që nga kontakti i parë me banorët e zonave të prekura nga tërmeti tragjik përkundër provokimeve që vinin nga Kryeministri Edi Rama në ditën e parë të tragjedisë:

“Qëllimi nuk është të përdorim politikisht fatkeqësinë e madhe që na ka ndodhur, por t’u vijmë në ndihmë qytetarëve, prandaj, duhet të shmanget çdo dalje publike apo reagim personal, që mund të merret si përdorim politik i fatkeqësisë.”