Ujin tonë të përditshëm falna sot!
nga Agim Popoci
As mjerimi i kohës Migjenit nuk njihte mungesë uji, ndonëse duhet pranuar se i mungonin përrallat e Edi Ramës që Lili t’ia fuste gjumit dhe të mos i binte më në mend jo për bukë, por, për asgjë në botë, as për anëtarësimib e Shqipërisë në Bashkimin Evropian!
Ndryshe, fajin nuk do ta kishte Saliu meqë ende nuk kishte lind, por ishin Hasan Riza Pasha e pse jo edhe Esat Pashë Toptani, që si jezitë dezhurn i duhen të paaftëve si Edi Rama ta gjejnë fajtorin!
Fajtorin, me të cilin ky Kryeministër po tallet me një popull të tërë duke harruar se si Lilit e Migjenit ashtu dhe çdo shqiptari në botë sot nuk i hynë në punë eskorta që shoqëron tubin e Edi Ramës, por, uji, uji në çesme që Rama e premtoi në vitin 2013 sepse, sipas tij, Saliu e kishte lënë pa ujë Vlorën dhe gjithë Shqipërinë, dhe do vinte ky çudibërësi që do t’ja kalonte edhe Millosh Gjergj Nikollës me rrëfimet e tij ku ngopeshin shqiptarët me ujë!
– Nanë, ujë…ujë nanë, – dhe në jastëk sillte kryet herë në një anë, herë ne tjetrën, me gishta që dridheshin kapte safen e ujit dhe s’e lëshonte pa e pi deri në fund. E e ama ia tërhiqte:
– Mjaft, moj nanë…Lil, mjaft ke pi… rrëfente kështu Migjeni për Lilin pa bukë por me ujë që shqiptarët nuk e kanë pa që nga viti i zi 1945, kur komunistët shkelën në tokën shqiptare dhe e pushtuan zinë e bukës!
Dhe, në shëmbëlltyrën e tyre për të mos lejuar ta shijon njeri lirinë nga zija e bukës, llumi komunist solli Edi Ramën nga Parisi, një njeri që thonjët nuk i prenë, uji nuk i intereson ashtu si edhe sapuni, ama dinë të tregoi përralla e kur duhet ndonjë uratë në vend të bukës, në majë të gjuhës ka gjyshen katolike që do ta ndihmoj me thëniet e saj vetëm për të mos shuar urinë!
E si do të qeverisej ndryshe ky vend përveç se me mjerim, kur edhe pas 12 vjetësh askush nuk i kërkon asnjë gotë ujë më shumë se sa në ditën kur akuzoi Saliun, e për t’i dëshmuar në vepër Sigurimit të Shtetit që e solli në pushtet, se është në rrugën e duhur, e bëri testin me Sarandën, i la tre ditë pa ujë dhe nuk u ankua njeri, madje vetë Drejtori i Ujësjellësit tha se nuk i ra njeri as telefonit!
Të njëjtin eksperiment e përsëriti edhe çdo sezon turistik kur bizneset janë pak më të ndjeshme kur goditen në xhep, por nuk u ankua njeri dhe Edi Rama nuk kishte arsye pse ta përmirësonte furnizimin me ujë, ashtu siç kishte premtuar!
Me talljen e fundit qeverisëse, që tejkaloi edhe makabritetin e kriminelit Enver Hoxha, Kryeministri emëroi për ministre një krijesë ergysi që nuk do t’ja dijë as për bukë dhe as për ujë, dhe këtë lindje të shpresës së tij qeverisëse pa ankesa, Edi Rama e pagëzoi, Diella!
Kjo Diella, jo vetëm që nuk çau kokën për humbjen e bukës në tryezat e shqiptarëve ndërsa ergysët e belindat po bënë namin, por as për humbjet në rrjet të atij pak uji që po rrjedhte nëpër tuba, madje edhe për ato tuba që nuk e njihnin ujin fare, ndonëse u bënë lesh e li 298.24 milionë euro kredi të huaja që nga viti 2015, vetëm për ujësjellës!
Në këtë rehati, kur lodhjen e Diellës nuk e kuronin as verërat 33 mijë euroshe, zëvendësimin e bënte SPAK duke ushqyer këtë popull të uritur për bukë dhe pa ujë, me akuzat kundër zyrtarëve të lartë shqiptar që futeshin në agrobiznesin e Edi Ramës dhe hanin kumbulla e dardha pa hesap!
Beqja apo Sajme qorri, Tigri apo Bela, pak rëndësi ka, e rëndësishme ishte dhe është që këtij populli të mos i japin as bukë e as ujë, për të tjerat kujdeset Palloshi që lejon të frymojnë në tokën shqiptare, hajdut deri në dy metro!
Pse rri i kërrusur Ilir Beqja pas koncesionit të sterilizimit sot është e qartë, ashtu siç është e qartë pse e bënë kolonoskopinë Lali Eri kur gjithkund i fut hundët, por, nuk është e qartë pse Likja kërkon ujë në bidon kur e gjithë Shqipëria nuk ka ujë!
Kështu deri sa Likja u pajtua me fatin se nuk mund të çoj pesha që kanë ujë, një fadromë e dalldisur nga zgjedhjet e 11 Majit i dha një goditje qytetit të flamurit duke i mohuar edhe ato pak orë me ujë.
Pas pesë ditësh, eksperimenti dështoi, morrat bënë të veten dhe shqipet e flamurit ia mësynë festës së Bashkisë Vlorë, ku nuk dihet se pse po festohej, që vlonjatët nuk po ankohen që nuk kanë ujë apo që janë mrekulluar në varfërinë e pafundme si Shkodra e kulturës, sa ka deti ujë e ranë!
Por, çudia ndodhi, dolën ca vlonjatë që nuk e durojnë më talljen e Edi Ramës, nuk u hynë më në punë as “Faji i Saliut” sepse duan ujë; Palloshi e nuhati me hundën e tij të krimit se po i rrëshqet dheu nën këmbë, ndërkohë për ato rrëshqitje të dheut që çanë tubin e Vlorës, zgjidhjen i gjeti vëllau i tij turk, Erdogan!
Përkushtimin e tij ndaj Vlorës e demonstroi me forcën e shtetit, tubin e Erdoganit nën përcjelljen e eskortës e çoj deri në vendin ku ndërtuesit e Belës degjeneruan tubin e ujit, e për ta mbërthyer gjithë këtë aksident që i trazoi betejën e tij me SPAK-un, siç u kujdes Nana për Lilin duhej dhe urata e gjyshes katolike të Edi Ramës të kujdeset për pjesën më intime të qeverisjes komuniste të nipit të saj, përveç se zinë e bukës, ujin!
– Ati ynë që rri në qiell, shejtnue qoftë emni i yt, të mbrijë mbretnimi yt, të bahet vullneti i yt sikur në qiell edhe në tokë… do të vazhdonte Nana e Lilit duke kërkuar bukë, por, jo edhe gjyshja e Edi Ramës që uron për nipin e tij si në qiell ashtu edhe në tokë, të sundoj mbi këtë popull të mjerë që i mohohet edhe uji, dhe ai vazhdon e lutet me kokën poshtë:
– Ujin tonë të përditshëm falna sot!
