“Ujku Shigjetë”, Maqedonci: Investimet në armatim, mbështetje për kapacitetet e FSK-së

Pas ushtrimit të ushtarëve të Forcës së Sigurisë së Kosovës FSK, “Ujku Shigjetë”, Ministri në detyrë i Mbrojtjes, Ejup Maqedonci, e ka cilësuar si një nga objektivat kryesore të planit zhvillimor për ushtrinë.

“Pra, me këtë ushtrim ne po përmbyllim një fazë dhe po kalojmë në një fazë tjetër. Kemi marrë masat dhe jemi duke u përgatitur për ta finalizuar. Me këtë rast falënderoj komandantin e FSK-së gjeneral Jasharin për punën e jashtëzakonshme dhe angazhimin e pashembullt për të arritur objektivat pavarësisht sfidat,” tha ministri Maqedonci duke e konsideruar si një ditë shumë të rëndësishme për ushtrinë e Kosovës.

“Sot po përmbyllim një prej objektivave kryesore të planit zhvillimor të Forcës së Sigurisë së Kosovës, atë të certifikimit dhe validimit  të të gjitha kapaciteteve të këmbësorisë regjimenteve të këmbësorisë së FSK-së,” tha Ministri në detyrë i Mbrojtjes, Ejup Maqedonci, duke folur dhe për rolin e ekipeve nga Shtetet e Bashkuara ndërsa përfundon:

“Falënderojmë edhe ekipet nga SHBA-të të cilat kanë qenë vazhdimisht krah zhvillimit të FSK-së investimet e qeveria në mbrojtje në armatim personel trajnim dhe infrastrukturë janë një mbështetje shtesë për kapacitetet e FSK-së  në arritjen e objektivave qe kemi përpara.”

Ndryshe, sot u organizua Dita e Vizitorëve në ushtrimin fushor “Ujku Shigjetë”, të cilin Forca e Sigurisë së Kosovës e realizoi në poligonin ushtarak në Babaj të Bokës, në Komunën e Gjakovës.

Forca e Sigurisë së Kosovës përmes Regjimentit të Tretë të Komandës së Forcave Tokësore zhvilloi ushtrimin fushor “Ujku Shigjetë”, pas një cikli të gjatë trajnimesh dhe përgatitjesh intensive në kuadër të procesit të validimit të regjimentit.