Ujmani e shiti sovranitetin, ra shteti i Kosoves…

Fjalët më të rënda u thanë në Prishtinë dhe Bruksel, u deklarua edhe nga Presidenti i Kosoves, Hashim Thaçi se Presidentit të Serbisë, Aleksandar Vuçiç iu refuzua vizita në liqenin e Ujmanit për ta mbrojtur sovranitetin e Kosovës.

Këtë Aleksandar Vuçiç e përdori si sebep për të refuzuar të takohet me homologun e tij kosovar në Bruksel, dhe retorika u ashpërsua më shumë duke mos menduar se për disa orë sovraniteti i Kosovës do të degjenerohet jo për Ujmanin por për shkak të zyrtarëve të papërgjegjshëm të Kosovës.

Shteti i Kosovës në orët e pasditës vendosi t’ia lejojë presidentit të Serbisë, Aleksandar Vuçiç që gjatë vizitës në Kosovë ta vizitojë edhe liqenin e Ujmanit.

“Kërkesa është rishqyrtuar dhe është miratuar itinerari në përputhje me kërkesën zyrtare dhe në përputhje me rregullat për vizitat e zyrtarëve të lartë të paraparë me marrëveshjen e Brukselit”, thuhet në përgjigjen e re të institucioneve të Kosovës që i kanë kthyer palës serbe.

Burime brenda institucioneve të Kosovës bëjnë të ditur se pala kosovare gjatë gjithë ditës ka qenë në kontakt me partnerët perëndimor lidhur me këtë vendim; Por nuk është e qartë se këto institucione të Kosovës a ishin në dijeni se kanë partnerë perëndimor edhe para se ta nisin përgjigjen e parë drejtë Beogradit, dhe nuk do të ndodhte hataja sikur të këshilloheshin me këta partnerë.

Tashm është vonë, nuk do të ndodhë hataja por turpi dhe faqja e zezë. Mbrëmë, Aleksandar Vuçiç e bëri publike se do të shkojë në Kosovë dhe vizitën do ta filloj pikërisht nga Ujmani, aty ku Hashim Thaçi dhe Ramush Haradinaj e mbrojtën sovranitetin e Kosovës deri në orët e para të ditës së premte.

Sot, sovranetit është i përdhosur në Ujman, shteti  i Kosovës ra, dhe Aleksandar Vuçiç do të shetis i qetë nëpër Kosovë duke sodit këtë vend të bukur që vazhdon të qeveriset nga çobanët e llojit më të keq që ka toka shqiptare.