Ukraina fton OKB-në dhe Kryqin e Kuq Ndërkombëtar në Kursk të Rusisë
Ukraina tha sot se i ka kërkuar Kombeve të Bashkuara dhe Komisionit Ndërkombëtar të Kryqit të Kuq, ICRC, t’u bashkohen përpjekjeve humanitare në rajonin Kursk të Rusisë, në të cilin forcat ukrainase e kryen një inkursion në gusht.
Ushtria ukrainase tani ka nën kontroll rreth 100 vendbanime në rajonin e Kurskit një muaj pasi e nisi inkursionin befasues, sipas presidentit të Ukrainës, Volodymyr Zelenskyy.
Ministria e Mbrojtjes e Rusisë tha se forcat ruse i kanë rimarrë nën kontroll edhe dy fshatra të tjera në këtë rajon.
Ministri i Jashtëm i Ukrainës, Andriy Sybiha, tha se e udhëzoi dje Ministrinë e vet t’i ftojë OKB-në dhe ICRC-në të punojnë në rajonin e Kurskut.
“Ukraina është e gatshme ta lehtësojë punën e tyre dhe të sillet në përputhje me ligjin ndërkombëtar humanitar,” tha Sybiha përmes rrjetit social X gjatë një vizite në Sumi, nga ku forcat ukrainase e nisën sulmin matanë kufirit.
Ai tha se ushtria ukrainase po garanton ndihmë humanitare dhe kalim të sigurt për civilët në rajonin e Kurskut.
Ministria e Jashtme e Ukrainës tha se ftesat u janë dërguar OKB-së dhe ICRC-së “duke marrë parasysh gjendjen humanitare dhe nevojën për të siguruar të drejta themelore njerëzore në territorin e rajonit të Kurskut”.
Ajo tha se i ka kërkuar ICRC-së të vëzhgojë nëse Ukraina po vepron në përputhje me parimet e ligjit ndërkombëtar humanitar.
Nuk është e qartë nëse OKB-ja dhe ICRC-ja janë përgjigjur.
Agjencia shtetërore e lajmeve e Rusisë, TASS, e citoi zëdhënësin e Kremlinit, Dmitry Peskov, duke thënë se deklarata të tilla janë provokuese.
Ai e bëri të qartë se Moska, e cila e nisi pushtimin e plotë të Ukrainës më 2022, pret që OKB-ja dhe ICRC-ja të mos i pranojnë ftesat.
Ndryshe, Ukraina ka nisur një inkursion në rajonin e Kurskut në Rusi më 6 gusht të vitit 2024. Forcat e saj tani kontrollojnë rreth 900 kilometra katrorë të territorit brenda Rusisë. Presidenti ukrainas, Volodymyr Zelenskyy, është shprehur se një ndër objektivat e operacionit është kapja e ushtarëve rusë për shkëmbim me ata ukrainas, dhe se e njëjta qasje vlen edhe për territorin.
