Ukrainë-Rusi dakord për korridore humanitare, forcat ruse sulmojnë ukrainasit në Mariupol
Autoritetet ruse dhe ukrainase sot ranë dakord për hapjen e disa korridoreve humanitare për evakuimin e civilëve.
Ministria e Mbrojtjes e Rusisë tha se korridoret u hapën nga Kievi, Çernihivi, Sumi, Harkivi dhe Mariupoli, nga ku pritet të ikin rreth 200,000 njerëz. Por, Ministria e Mbrojtjes e Ukrainës tha se korridori humanitar në Mariupol është sulmuar nga forcat ruse.
“Armiku ka nisur një sulm pikërisht në drejtim të korridorit humanitar,” tha Ministria ukrainase përmes një postimi në rrjetin social Facebook duke saktësuar se ushtria ruse “nuk i la fëmijët, gratë dhe të moshuarit të largohen nga qyteti”.
Derisa raportohet për luftime të intensifikuara në disa pjesë të Ukrainës, korrespondentët e RFE në terren konfirmojnë se evakuimi i banorëve nga qyteti Irpin, afër Kievit, po vazhdon gjithashtu.
Ndërkohë Zv/Kryeministrja e Ukrainës, Iryna Vereshchuk, tha se civilët do të nisin të largohen nga qyteti i rrethuar, Sumi, pas një marrëveshjeje me ushtrinë ruse për hapjen e një korridori humanitar.
“Është rënë dakord që kolona e parë të niset në orën 10:00, nga qyteti Sumi. Popullsia lokale do të niset me automjete personale,” tha Vereshchuk për qytetin e Sumit, i cili ndodhet pranë kufirit me Rusinë, rreth 350 kilometra në lindje të kryeqytetit të Ukrainës, Kiev, dhe është në shënjestër të bombardimeve intensive ruse.
Të paktën nëntë persona, përfshirë dy fëmijë, kanë vdekur nga një sulm ajror në qytet, thanë sot shërbimet ukrainase të shpëtimit. Udhëheqësi i administratës rajonale të Sumit, Dmytro Zhyvytskyi, tha në një reagim përmes rrjetit social Facebook se katër ushtarë ukrainas janë vrarë gjithashtu ndërsa e përshkroi situatën si “luftë të pabarabartë me ushtrinë ruse”.
Zyra e prokurorit rajonal tha sot se së paku 21 civilë, përfshirë dy fëmijë, u vranë nga një sulm ajror i ushtrisë ruse në qytetin verilindor të Ukrainës, Sumi. Sulmi ndodhi mbrëmë vonë në një lagje të banuar. Trupat e viktimave u gjetën nga shërbimet e urgjencës sot në mëngjes, tha Zyra e prokurorit.
Kreu i agjencisë së OKB-së për refugjatët tha se pret që numri i njerëzve që ikin nga lufta në Ukrainë, të arrijë shpejt në dy milionë.
“Unë mendoj se do ta kalojmë shifrën prej 2 milionësh sot, ose ndoshta më së voni nesër,” tha Komisionari i Lartë i Kombeve të Bashkuara për Refugjatët, Filippo Grandi ndërsa ka konfirmuar qysh dje se numri i të zhvendosurve ukrainas ka kaluar 1.7 milionë.
Roja Kufitare Polake tha sot se rreth 1.2 milionë prej tyre kanë hyrë në Poloni ndërsa Shefi i diplomacisë evropiane, Josep Borrell, ka paralajmëruar se Evropa duhet të përgatitet për miliona të zhvendosur nga Ukraina.
Ndërkohë pamjet e mëngjesit të sotëm në qytetin e Lvivit në Ukrainë janë shqetësuese.
Refugjatët që ikin nga lufta në Ukrainë presin me orë të tëra për të marrë trenin drejt Polonisë, raportojnë korrespondentët e RFE në terren.
Ndryshe, sulmi i Moskës ndaj Ukrainës ka nisur në orët e para të 24 shkurtit. Presidenti rus, Vladimir Putin ka urdhëruar “operacion special” për të çmilitarizuar Ukrainën. Veprimi i Kremlinit ka nxitur zemërim dhe është dënuar në gjithë botën. Shtetet e Bashkuara dhe aleatët janë përgjigjur me sanksione të ashpra kundër Moskës./RFE/
