Ulqin, 45 % më shumë turistë!

Në Ulqin aktualisht po qëndrojnë 30.965 turistë, që është 45 për qind më shumë se vitin e kaluar, dëshmojnë të dhënat e Organizatës Turistike të Ulqinit.

Edhe këtë vit më së shumti turistë ka nga Kosova por nuk mungojnë as nga vendet perëndimore, raporton televizioni publik i Malit Zi, RTCG.

Aktualisht nga 30.965 pushues të lajmëruar zyrtarisht që po qëndrojnë në Ulqin, 90 për qind janë nga jashtë shtetit dhe pushues vendor janë vetëm 923, thekson Organizata Turistike.

Qëndrimin në shtëpi private nga këta turistë e kanë përzgjedhur 24.367, në hotele 5.703, në kampingje 573, ndërsa në pushimore 322 pushues.

Edhe pse numri i turistëve të regjistruar në krahasim me vitin e kaluar është rritur ndjeshëm në Ulqin, dhe mund të quhet një sukses turistik krahasuar me numrin e popullsisë së këtij qyteti që është 10.707 banorë, Organizata Turistike nuk është e kënaqur nga të ardhurat me taksën e qëndrimit që mblidhet, sepse sipas tyre është shumë e ulët.

Këtë vit është vërejtur një angazhim më i madh i kontrollit dhe gjobave për pronarët e shtëpive dhe hoteleve që nuk i regjistrojnë pushuesit.

Kështu, turisti i cili nuk e ka fletëparaqitjen e qëndrimit paguan gjobën prej 150 euro, qiradhënësi tek i cili ai qëndron paguan gjobën prej 150-500 euro, derisa gjobat për hotelet, pushuesit e të cilëve nuk e kanë paguar taksën e qëndrimit, gjoba është nga 50 deri 3.000 euro, ndërsa personat përgjegjës prej 150- 500 euro. Nga Organizata Turistike e Ulqinit kanë porositur se kontrollet do të vazhdojnë deri në fund të sezonit turistik ashtu si edhe gjobat pa mëshirë.

Ndryshe, sipas Organizatave Turistike lokale, në Mal të Zi po qëndrojnë 140 mijë turistë ose 9 për qind më shumë se vitin e kaluar.