ULTIMATUMI/ Banorët e Unazës së Re: Deri nesër në orën 10, ndryshe…

Edhe pse protestuan për më shumë se dy orë para Bashkisë së Tiranës, dhe kërkuan takim me Erion Veliajn ose ndonjë përfaqësues të bashkisë, banorët e Unazës së Re nuk i takoi njeri. Negociatat e vetme që zhvilluan ishin ato me policinë të cilët me mirësjellje kërkuan nga ata që të lirojnë rrugën.

Në fund, protestuesit u lraguan nga rruga për të vazhduar nesër protestën sërish para bashkisë duke i lënë afat Erion Veliajt deri nesër në orën 10:00.

Sipas tyre, nëse ky takim nuk do të zhvillohet ata do të bllokojnë sërish rrugën dhe nuk do ta lirojnë më atë.

“Nuk e lirojmë rrugën pa u zgjidhur halli jonë,” theksuan banorët e Unazës së Re në Tiranë, shtëpitë e të cilëve preken nga projekti i zgjerimit të rrugës.

“Ne nuk jemi kundër ndërtimit të rrugës, por të na kompensojnë me atë që na takon”, tha njeri prej tyre.

Krahas parullave “Kryeministër, ku je fshehur? Lali Eri ku je fshehur?”, banorët kanë rrëmbyer megafonët dhe kanë folur secili me radhë.

“O Erion, kemi 30 vjet që jetojmë aty. I kemi paratë në emigracion. Shtëpitë tona janë me gjak,” tha një tjetër qytetar në sfondin e të cilit dëgjoheshin thirrjet: “Duam pronat tona, duam shtëpitë tona!”

Ndërkoh njëri prej banorëve të revoltuar rrëfej para mediave rastin e tij të rrallë, për botën e civilzuar:

“Më kanë marrë nusen e djalit që të lind në burg, ka burra ajo shtëpi nuk ka vetëm gra. Të gjithë këta njerëz nuk i shkelin dot. Turp, turp, turp”, u shpreh qytetari i shoqëruar me thirrjet e qytetarëve  kundër qeverisë dhe politikanëve:

“Pa marrë jetën e njerëzve nuk ke për t’i prishur ato shtëpi, shtëpitë tona janë me gjak!”

Ndryshe, protesta e banorëve të Unazë së Re për disa ditë  është zhvilluar para shtëpive dhe bizneseve të tyre  duke bllokuar rrugën kryesore, por sot ata janë zhvendosur përpara bashkisë së Tiranës .