Unaza e Madhe/ Fadromat pushtojnë Laprakën, nis shembja e shtëpive pa paralajmërim…

Pas Unazës së Re dhe Shkozës, Inspektoriati Kombëtar i Mbrojtjes së Territorit, IKMT ka nisur një betejë të re për realizimin e projektit të Unazës së Madhe.

Fadromat për shembjen e shtëpive dhe dëbim i banorëve nga Erion Veliaj është zhvendosur në Laprakë.

Gjendja është tensionuar dhe skenari është i njejtë: dhunë ndaj banorëve, largimi i tyre nga shtëpitë pa paralajmërim dhe përballja me  fadromat, siç u veprua tek Unaza e re dhe Shkoza.

Bajram Nela, banues në zonën e Laprakës, ku kalon një pjesë e gjurmës së projektit të Unazës së Madhe, thotë se vetëm dje i është skualifikuar shtëpia nga procesi i legalizimit, dhe sot kanë mbërritur fadromat për t’ia prishur shtëpinë.

“Qeveria shqiptare më ka dhënë 24 orë kohë që të dal nga banesa, dhe me një document të paligjshëm vijnë dhe më prishin shtëpinë këta. Ne do të qëndrojmë këtu deri në vdekje, këtu do të rrimë do të luftojmë deri në fund,” thekson Barjam Nela duke bërë publik dokumentin që ai ka marrë se nuk ka logon e institucioneve, dhe  sipas tij nuk ka se si të jetë i ligjshëm.