Unaza e Re, Balliu: Të bashkuar do të largojmë farën komuniste të Edi Ramës

Në protestën te Unaza e Re e banorëve të prekur nga projekti Unaza e Madhe, janë lëshuar thirrje kundër qeverisë dhe kryeministrit Edi Rama, ndërkohë protestuesit kanë kërkuar edhe burgosjen e ministrit të Transporteve, Damian Gjiknuri.

I pranishëm në protestë, deputeti i Partisë Demokratike, Klevis Balliu u ka bërë thirrje qytetarëve që të qëndrojnë të bashkuar, pasi vetëm në këtë mënyrë do të largojnë farën komuniste njëherë e përgjithmonë.

“Jam i bindur se të bashkuar do të mundim njëherë e mirë klikën mafioze të Edi Ramës dhe Erjon veliajt. Dje ka patur presione nga policia dhe civilë të cilët kanë ardhur të provokojnë protestuesit, i themi qeverisë se asnjë provokim nuk do të tolerohet,” tha Klevis Balliu duke shtua:

“Pse nuk është në burg, Rama, Veliaj, Qendro dhe Mond Bego por është Danieli. Kjo sepse kemi të bëjmë me një qeveri të korruptuar. Të bashkuar do të largojmë njëherë e mirë farën komuniste të Edi Ramës,” tha Balliu. Ndryshe, sot u shënua dita e 61-të e protestës te Unaza e Re ku kërkesa e banorëve për dëmshpërblim me çmin e tregut, në vitin e ri 2019 ka avancuar me anulimin e plotë të këtij projekti korruptiv.