Unaza e Re/ Banorët: Nesër në orën 11:00, nis protesta pa afat…

Protesta e banorëve te “Unaza e Re”, banesat e të cilëve preken nga ndërtimi i projektit të “Unazës së Madhe”  përfundoi me një paralajmërim.

Nesër, deklaruan banorët te “Unaza e Re” në mbyllje të protestës për ditën e sotme, nesër proetsta fillon në orën 11, dhe sipas tyre, do të jetë pa afat.

Dhuna policore

Protestuesit te “Unaza e Re” përveç censurës mediatike tashmë po përballen edhe me dhunën policore.

Dita e 14 e protestë sot u zhvillua pa ndriqim publik ndërkohë u bllokuan si zakonisht të dy anët e rrugës.

“Shtëpitë do ti mbrojmë me gjak”, thirrën në kor banorët ndërkohë njëri prej tyre ishte paksa më i zemëruar me politikat e kryetarit të bashkisë Erion Veliaj dhe kryeministrit Edi Rama për të cilët kishte një mesazh të qartë:

“Pronën do e mbroj me armë!”

Por kishte prej atyre që edhe pse nuk ishin shprehur në këtë mënyrë gjatë këtyre ditëve i ishin nështruar dhunës së egër policore. Dëshmia e një gruaje që kishte përjetuar momentet tmerri, madje këto i dëshmoi me gjurmët e dhunës policore, ishin me skenar të shëmtuar të diktaturës së Enver Hoxhës edhe pse për ironi të fatit urdhërohet nga klika aktuale e qeverisjes në vitin 2018, pikërisht në Ditën e çlirimit:

“Më erdhën rreth 20 policë dhe më tërhoqën zvarrë Policia më arrestoi djalin dhe më pas më dhunoi. Kam qenë në spital, pasi isha shumë keq,” rrëfente një protestuese tek Unaza e Re për “News24” momentet e tmerrit që kishte përjetuar me familje  ndërsa tregonte shenjat që kishte në krah nga goditjet e policisë së Komisariatit të Kombinatit.

“Policia më arrestoi djalin. Më arrestuan pardje djalin dhe vet kam
qenë në spital. Shkoni si jam bërë. Më mori policia e Kombinatit. Ka tre ditë që ka ndodhur ngjarja. Kam qenë sëmurë.Dhe mbrëmë kam qenë në spital në orën 2 të natës pasi na kanë shqetësuar shumë. Më erdhën rreth 20 police në vendin e punë dhe më tërhoqën zvarrë. Më kërkuan telefonin e djalit, se di pse e kërkonin”, tha zonja.

Ndryshe, banorët, banesat e të cilëve janë të legalizuara dhe preken nga projekti “Unazës së Madhe” , kërkojnë dëmshpërblim me vlerën reale të tregut dhe jo sipas legjislacionit në fuqi. Ndërkohë për ata që banesat i kanë pa leje, bashkia thekson se do të përfitojnë qira 3-vjeçare, por banorët janë kundër kësaj zgjidhjeje.

Veliaj: S’ka shpronësim për llotot e lavazhet pa leje

Dhe, deri sa banorët tek Unaza e Re flasin për atë që është e pranueshme për ta, kryetari i bashkisë së Tiranës, Erion Veliaj foli me një gjuhë edhe më ashpër.

Ngjashëm me mësuesin e tij politik Edi Rama, shembullin e të cilit po e ndjek në ngjitjen politike drejtë kryeministrisë, Veliaj përdori fyerje duke filluar nga PD e deri tek banorët tek Unaza e Re, të cilët kërkojnë dëmshpërblim për banesat që do t’u shemben.

Duke harruar premtimet kur mori votën dhe këto shtëpi nuk ishin as “pa leje” dhe as të “shpellarëve” ai nga Vaqarri sërisht dha premtime duke thënë se pronarët që preken nga Unaza e Madhe do të shpronësohen, kurse për ndërtimet pa leje do të ketë 3 vite bonus qiraje dhe banesa sociale. Dhe sërish akuza, me shembujt e tij imagjinar me zona të zaptuara nga llotot, lavazhet, gomisteritë dhe shtëpi me 8 kate pa leje, për të cilë u kujdes edhe ta faktonte me një foto:

“E kuptoj kur nga nevoja njeriu ndërton shtëpi për të jetuar, por 8
kate nuk është nevojtar, o miqtë e mi!Pse duhet t’ia marrë qeveria,
bashkia lekët modeste të taksave dikujt në Vaqarr dhe në vend që të bëjmë shkollën këtu, në vend që të bëjmë rrugën, duhet t’i japim lekë dikujt që thotë ‘jam den baba den’ në një shtëpi me 8 kate, ku qartazi as i ka mbaruar 8 katet?”

Protestuesit tek “Unaza e Re” vërtetë kanë kërkuar takim me kryetarin e bashkisë Tiranës me shpresën se halli i tyre mund të zgjidhet por fjali i një djali kaq të ri, është për ta admiruara edhe Kom Jong Un.

Po, portesuesit e kërkojnë por ja cfarë thotë ai për protestuesit:

“Protestuesi më i madh Eurolloto!

Po pse duhet njerëzit që s’luajnë baste të shpronësojnë një lloto?!

Pse mos bëjmë një kopsht në Vaqarr, po duhet të japim lekë për lloto?

Pse do heqim lekët e çerdheve për të shpronësuar një pikë bastesh, a ma thoni dot?!

Për çfarë po protestojnë? Ky lavazhi ishte trotuar, i ka vënë vetëm këtë tendën portokalli dhe thotë më shpronësoni. Po kë të shpronësojmë more? Trotuari ishte i yni, i të gjithëve. Lekët do t’ia japim për shtëpinë, kush nuk ka asnjë letër, do t’i japim shtëpi sociale.

Kush nuk ka asnjë gjë në botë, do t’i japim 3 vite qira falas.”

Njeriu që më shumë ka bërë protesta në qytetin e Tiranës se sa ka shitur fiq “për të krijuar” kapitalin që ka, jo vetëm që nuk i mirëkupton protestuesit por edhe i kërcënon ata:

“Të ndezin zjarr sa të duan, të djegin goma sa të duan, por fatin e
familjeve dhe fëmijëve të këtij qyteti e kemi vetë në dorë. Ose do të shkojmë përpara dhe do të ecim me zhvillimet e Tiranës ose do të ngelemi mbrapa dhe nuk do e kapim kurrë veten.”

Dhe, në delir e sipër, ndonëse rikujtoi 21 janarin e vitit 2011 për të sulmuar Partinë Demokratike, harroi se ishte pikërisht kjo protestë e Partisë Socialiste e cila i vuri flakën gjithçkaje që i doli përpara me përjashtim të ajrit. Por ky usta i Mjaftit vazhdoi me akuza dhe propagandë:

“Shoh protestën për Unazën, s’kishte asnjë banor atje. Ishte gjithë FRPD dhe kryetari i PD-së së Burrelit, nga ata që ishin tek Garda në 21 janar, që vranë njerëzit me plumba në mish.

Vjen nga Burreli, proteston për rrugën në Tiranë! Pyetja që unë kam për PD: S’ju ka mbetur asnjë simpatizant në Tiranë, që mund të protestojë? Duhet patjetër me i sjellë nga rrethe të tjera që të kundërshtoni punën në Tiranë?

Kaq keq ka ardhur puna, që partia që solli pluralizmin në Shqipëri nuk gjen dot një protestues nga Tirana dhe duhet ta ndyjë qytetin me dhunë, me zjarr, me plehra, me goma që digjen, me njerëz që vijnë nga qytete të tjera?

Fakti që qytetet që PD i ka falimentuar dhe i përdor vetëm për militantë për të bllokuar punët në Tiranë, tregon se ata janë në këtë ditë të zezë dhe ne jemi në drejtimin e duhur,” përfundoi Erion Veliaj i qartë në botën e tij, si e ka menduar zbatimin e projektit të “Unazës së Madhe” por jo edhe si sigurt në orët dhe ditët në vijim që mund të prodhojë protesta.