Unaza e Re, bllokohet qarkullimi…

Ndërkohë që po zhvillohej protesta e studentëve, në Tiranë filloi edhe protesta te Unaza e Re. Banorët janë vendosur në të dyja asket e rrugës pranë mbikalimit në këtë zonë, duke bllokuar qarkullimin e mjeteve. Të vetmet mjete që janë lejuar të kalojnë, ka qenë një ambulancë dhe makinat që ishin para saj.

Protesta te Unaza e Re shënon ditën e 44, ndërsa banorët kundërshtojnë prishjen e banesave të tyre siç e parashikon plani për ndërtimin e aksit nga sheshi “Shqiponja”, te mbikalimi pranë pallatit me shigjeta. Ata kërkojnë edhe rrëzimin e projektit.

“Poshtë projekti”, thirrën protestuesit, të cilët hodhën akuza e sharje edhe ndaj kryeministrit Edi Rama dhe ministrit të Infrastrukturës Damian Gjiknuri.

Deputetë të opozitës nuk kanë munguar në mbështetje të protestës.

“Rama ka marrë ryshfete për këtë tenderim fiktiv, është tenderim fiktiv se kompanitë e tjerë bënë ofertë 0”, tha deputeti i PD Klevis Balliu duke shtuar:

“I ftoj qytetarëve të tjerë të bashkohet me Unazën e Re, sepse 40 milionë euro janë taksat e tyre”.

Deputeti demokrat apeloi te qytetarët ti bashkohen edhe protestës së studentëve.

“I bëj thirrje çdo qytetari të mbrojë shtëpinë e vet, të mbrojë jetën e vet se qeveria ka rënë dhe praktikisht sot çdo qytetar ka dy dyar për një kokë se nuk ka qeveri që ti sigurojë as sigurinë, as drejtësinë, as ekonomisë, pra duhet të marrin masat vetë. I bëj thirrje qytetarëve të bashkohen me studentët nesër. Të marrin masat, të mbrojnë studentët, të mbrojnë të drejtat e tyre, të mbrojnë paratë e tyre, taksat që ata kanë paguar për të pasur më në fund një shtet të së drejtës”, theksoi deputeti i PD, Klevis Balliu.