Unaza e Re/ Erion Veliaj fillon prerjen e pemëve, banorët protestat…

Projekti i Unazës së Madhe vazhdon të shkaktorj tensione tek Unaza e Re në mes të bashkisë së Tiranës dhe banorëve që preken nga ky projekt me shembjen e shtëpive.

Sot deri sa banorët ishin duke depozituar një padi në prokurori kundër Erion Veliajt, INUK dhe ARRSH-së, në rrugën që kalon pranë shtëpive të tyre ka nisur prerja e pemëve, si masë për fillimin e punimeve pas ndërhyrjes në shtyllat elektrike.

Këto punime nga kompania Salillari, me prerjen e pemëve nga të dy anët  e rrugës, ka bërë që banorët e Unazës së Re të mblidhen dhe të fillojnë protesta menjëherë pavarësisht se ato ishin paralajmëruar për orët e pasditës.

Banorët fillimisht i janë drejtuar në grup, punonjësve të firmës dhe i kanë detyruar të lënë punën, ndërsa një ekskavatori të largohet prej aty. Policia vazhdon të jetë e pranishme për të shmangur konfrontimet ndërkohë situata po minotorohet edhe nga një ekip i Avokatit të Popullit

“Po e mbikqyrim situatën dhe kemi ardhur për ta ndjekur në rrugë administrative. Qëndrimin zyrtar e ka mbajtur vetë Avokatja e Popullit, dy ditë më parë.  Ne po mbledhim informacion në terren por jemi dhe duke ndjekur rastin e zonjës, e cila kallëzoi dhunën që ushtroi mbi të Policia,” sqaroi Inspektori i Avoktatit Popullit.

Avokati i Popullit njoftoi dy ditë më parë se ka nisur hetimet për këto zhvillime tek Unaza e Re dhe solli në vëmendje të publikut se Bashkia e Tiranës nuk ka leje për kryerjen e punimeve.

Ndërkohë së fundi mësohet se ARRSH ka kërkuar një grup përfaqësues nga Unaza e Re për takim.