Unaza e Re/ Lirohen protestuesit e arrestuar, Gjykata: Arrestim i paligjshëm!

“Arrestim i paligjshëm!” Kështu e ka vlerësuar Gjykata e Tiranës sot arrestimin e protestuesit Kujtim Ylli tek Unaza e re, ndërkohë protestuesi tjetër Romeo Llulla është liruar me masën “arrest shtëpie”.

Pas këtij vendimi të Gjykatës së Tiranë, deputeti i PD, Klevis Balliu, tha se arrestimi ishte politik ndërkohë i bëri thirrje qeverisë të heq dorë nga këto akte barbare.

“Qartazi, arrestimet dhe shoqërimet janë politike dhe masa që u ndërmor si  arrestim i paligjshëm për Kujtim Yllin, se arrestimi ishte politik, për të ushtruar presion ndaj banorëve që kanë sot 28 ditë që protestojnë është një akt i turpshëm i kësaj qeverie,” tha deputeti i PD duke i bërë thirrje qeverisë:

“Dua t’i bëj thirrje qeverisë, Edi Ramës, Erion Veliajt, të tërhiqen nga këto akte barbare që janë një sulm ndaj vetë protestës dhe sistemit demokratik që është vendosur në Shqipëri, që e kanë vendosur këta qytetarë me protestën dhe luftën që bënë ndaj regjimit komunist,” tha deputeti Klevis Baliu duke e bërë të qartë se PD do t’i mbështesë qytetarët e Unazës së Re si dhe çdo qytetar që lufton për një kauzë të drejtë, ligjore, si në rastin e Unazës:

“Këto presione nuk funksionojnë, këta banorë nuk do të lodhen, protesta do të vazhdojë, Partia Demokratike do të vazhdojë t’i mbështesë dhe në fund do të të triumfojë Tirana, do të triumfojë demokracia kundër një regjimi banditesk autoritar të klikës Rama – Veliaj.”