Unaza e Re/Përplasja e Policisë me Protestues, lirohen banorët e shoqëruar

Policia e Tiranës ka liruar banorët tek Unaza e Re të cilët u shoqëruan në komisariat gjatë mbrëmjes së sotme pas protestës dhe konfrontimeve me policinë.

Pasi janë marrë në pyetje për më shumë se 1 orë në dy komisariate të kryeqytetit, banorët janë lënë të lirë.

Në Komisariatin e Policisë nr.6 ishin shoqëruar shtetasit Gentian Gjoni, Altin Çejku;

Në Komisariatin e Policisë nr.3, Shkëlzen Sadikaj, Dritan Çejku dhe Adriatik Çejku.

Ndërkohë janë edhe disa gazetarë e kameramanë që raportonin nga terreni,që theksuan se janë dhunuar nga policia gjatë ndërhyrjes.

 Dita e 28-të e protestës, përleshje dhe arrestime…

Banorët tek Unaza e Re që preken nga projekti i Unazës së Madhe, ditën e tyre të 28 të protestës ku kërkojnë dëmshpërblimin 100 për qind për shtëpitë e tyre që do të shemben, e filluan me një minutë heshtje për ndarjen nga jeta të Ish-presidentit amerikan George H.W. Bush.

Ndryshe nga ditët e fundit, në zonën pranë mbikalimit, ku po zhvillohet protesta, kanë qenë prezentë efektivë policie me uniformë. Kjo ka sjellë pakënaqësi te disa banorë.

Një i moshuar, iu drejtua efektivëve duke u kërkuar llogari: “Pse keni ardhur”.

“Mos i dëgjoni ata eprorët tuaj se ata janë maskarenj”, iu tha ai.

Ndërsa tensionet ishin në rritje, vetëm ndërhyrja e deputetit të PD, Klevis Balliu ka qetësuar pak sa protestuesit.

“Gjithmonë do rrimë me shtetrrethime me këta rezila,” tha një i moshuari teksa u ktheu shpinën efektivëve të policisë dhe u largua prej tyre e banorët vazhduan duke thirrë në kor: .

“Qeveri e krimit”, “Qeveri e drogës”, “O dorëzou O largohu”, “Shtëpia jonë, jeta jonë”, e parulla të tjera kundër kryeministrit Edi Rama dhe kryetarit të bashkisë së Tiranës, Erion Veliaj.

Tensione në protestën e sotme në zonën e Unazës së Re, teksa policia ka ndërhyrë duke shoqëruar disa persona e në furgonin e policisë përfundoi edhe deputeti demokrat Klevis Balliu.

“Deputeti Klevis Balliu shoqëroi në furgonin e policisë një protestues, i ndaluar nga policia dhe ndodhen ne komisariatin nr.6,” sqaruan burime pranë PD ndërkohë që tensionet tek Unaza e Re arritën kulmin ndërsa deputeti Balliu zhvendosi misioin e tij në Komisariatin nr.6 për të mbrojtur të shoqëruarit në polici, sepse  policia sonte ishte më e  dhunshme se kurrë.

Banorët tek Unaza e Re vazhduan të kërkojnë lirimin e protestuesve dhe me kërkesën e disa  familjarëve protesta u zhvendos nga Unaza e Re tek Komisariati nr. 6 i Policisë së Tiranës.