Unaza e Re/ Protesta, 4 të arrestuar, 30 banorë të proceduar. Ku janë policët dhunues të Astrit Sadikajt…

Pas protestës së djeshme te Unaza e Re ku situata u përshkallëzua pas sjelljeve kriminale të policisë së Ish-Gjeneral Sandër Lleshajt dhe pati përplasje me banorët e prekur nga projekti korruptiv Unaza e Madhe, Policia e Tiranës ka arrestuar 4 shtetas në meisne të cilëve edhe Ish-Deputeti Klevis Balliu me arsyetimin “për veprime të dhunshme”. Po ashtu ka proceduar në gjendje të lirë dhe 23 persona të tjerë si dhe 3 janë shpallur në kërkim.

Veprimet, sqaron policia, vijnë pas një analize të pamjeve filmike, raport shërbimeve, si dhe provave të tjera të mbledhura nga grupi hetimor.

“Për sulmet dhe veprimet e dhunshme mbi punonjesit e policisë janë arrestuar shtetasit: K.B., 30 vjeç, banues në Tiranë, L.M., 42 vjeç, banues në Tiranë, S.H., 34 vjeç, banues në Tirane, E.S., 41 vjeç, banues në Tiranë,” sqaron policia duke shtuar se po punohet për identifikimin, kapjen dhe vënien para përgjegjësisë ligjore të personave të tjerë që kanë kryer veprime të dhunshme gjatë protestës së djeshme.

Që Policia e Shtetit është në shërbim të Edi Ramës deri dje mund të kenë qenë edhe akuza opozitare, por, pas analizave të pamjeve filmike, raport shërbimeve, si dhe provave të tjera të mbledhura nga grupi hetimor, siç thotë policia, nuk i ka identifikuar edhe kriminelët nën uniformën e policisë që i shkaktuan djegie të rënda në kokë, shpatulla dhe këmbë banorit të Unazës së Re, Astrit Sadikaj, i cili aktualisht është i shtruar në QSUT në repartin e djegies, kjo është më shumë se kriminale. Jo vetë policia por edhe shteti ka rënë. 

Dhe deri sa policia vret qytetarët sepse protestojnë kundër Kryeministrit, policia e Edi Ramës i ka referuar Prokurorisë së Rrethit Gjyqësor Tiranë, materialet proceduriale që dëshmojnë dhunën e qytetarëve ndaj policisë, për veprime të mëtejshme për veprat penale ”Kundërshtim me dhunë të punonjësit të rendit publik”, “Goditje për shkak të detyrës”, “Organizimi dhe pjesmarrja në grumbullime dhe manifestime të paligjshme”, ”Pengimi i qarkullimit të mjeteve të transportit”, “Prishja e qetësisë publike” dhe “Shkatërrimi i pronës”.