Unaza e Re/ Protesta vazhdon, Basha ndërkombëtarëve: Rama po vjedh! Ku jeni, për çfarë paguheni…
Ku jeni, për çfarë pune paguheni?! Ishte kjo pyetja e kryetarit të Partisë Demokratike, Lulzim Basha, për organizatat ndërkombëtare që financohen me paratë e taksapaguesve të Europës dhe gjithë botës, dhe lejojnë vjedhjen e hapur të Edi Ramës ndërkohë paralajmëroi se protestat vazhdojnë dhe sot në orën 17:00 edhe ai vetë do jetë atje
Sot, duke akuzuar kryeministrin Edi Rama se është autori i vjedhjes së 40 milionëve tek Unaza e Re, ai tregoi edhe se si e bënë kryeministri këtë vjedhje:
“Afera e Unazës së madhe është vjedhje direkte nga Rama. Gjithçka është negociuar nga Rama, vjedhja e Unazës së madhe përbëhet nga dy komponentë, rrëmbimi i taksave dhe i pronave të 1 mijë familjeve, 317 pronave që do të prishen në kundërshtim me ligjin. 2 mijë euro për centimetër të këtij aksi prej 2 km, imagjinoni, çmimin me të cilin Rama po vjedh paratë e taksapaguesve,” tha Lulzim Basha.
Dhe jo vetëm kaq!
“Skema e tenderimit është korruptive, pa garë, projekt i pakërkuar, ARRSH më pas gjoja hapi tender dhe u futën tre operatorë, secili me ofertë maksimale, operatori i katërt janë vëllezërit Hysa. Njëri nga tre operatorët i regjistruar në parajsa fiskale ka qenë nën sekuestro,” tha Lulzim Basha duke shtuar se prokurimi ndodhi pa u miratuar leja e ndërtimit. Gjithçka me nxitim të madh që kapari të përfundojë në vilën e Surrelit.
Dhe grabit pronën. I quan shpellarë, tha kryetari i PD, pse se kërkojnë të drejtën e tyre sipas ligjit që ua ka premtuar dy herë kryehajduti dhe loloja e tij në Tiranë.
“Kur ke në plan të vjedhësh 40 mln euro të erren sytë dhe nuk sheh as ligj as kushtetutë. Shpellarë, pse se kërkojnë të drejtën e tyre sipas ligjit që ua ka premtuar dy herë kryehajduti dhe loloja e tij në Tiranë. Norma juridike e vendosur me ligjin për legalizimin, shpronësohesh dhe pastaj të merret prona dhe zhvillohet projekti. Banorët duhet të dëshpërblehen, në dy lotet e tjera janë dëmshpërblyer. Është shpërndarë mashtrimi se këta njerëz janë zaptues, secili prej tyre e ka blerë pronën, paguan për 25 vite faturat, energjisë, ujit, fitues i ligjit të legalizimit, asnjë nga ata nuk është zaptues.”
E derisa Edi Rama vjedhë, lideri i opozitës tha se janë edhe organizatat ndërkombëtare që lejojnë vjedhjen e hapur:
“Kam një pyetje për organizatat ndërkombëtare që financohen me paratë e taksapaguesve të Europës dhe gjithë botës, të cilët lejojnë vjedhjen e hapur, duke shkelur çdo standard të mirëqenë të mirëqeverisjes dhe të shtetit ligjor. Ku jeni, për cfarë pune paguheni, për cfarë jeni për të bërë pasarela, për të ngrënë e pirë në restorante të shtrenjta, për të na treguar sa e mirë është vera shqiptare, ja e keni një kryeministër hajdut dhe harbut dhe po rreh fëmijë dhe gra për të vjedhur.”
Në fund, duke deklaruar se protestat e banorëve te Unaza e Re do të vazhdojnë dhe nuk do të ndalen deri sa e drejta e tyre të fitojë, paralajmëroi se në orën 5 të pasdites, qytetarët e Astirit do të jenë sërish në protestë dhe bashkë me ta do të jetë dhe vetë ai:
“Banorët e Astriti sot në orën 05:00 do të jenë në protestë. Unë do të jem bashkë me ata. Do të ngrihemi me këta njerëz edhe sikur padrejtësia të kufizohet vetëm me këta. Po mos prisni se atëherë do të jetë shumë vonë, kur padrejtësia t’ju vijë tek dera.”
