Unaza e Re, Protestuesit mesazh Qeverisë: Me trupin e jetën tonë do mbrojmë shtëpitë…

Protesta e banorëve të Unazës së Re kundër prishjes së banesave dhe bizneseve të tyre sot ka hyrë në ditën e 15-të dhe përkundër kërkesës së tyre për të takuar përfaqësues të qeverisë ose bashkisë, kërkesa e tyre ka ra në vesh të shurdhër. Kryeministri Edi Rama i përgjigjet përmes rrjeteve sociale ndërkohë kryebashkiaku Erion Veliaj në çdo tubim ordiner flet për zgjidhjen e kësaj situate por jo edhe  banorëve të revoltuar që vazhdojnë të bllokojnë rrugën.

Sot, banorët sërish kanë kërkuar dëmshpërblim me vlerën e tregut, janë shprehur se protesta e tyre nuk do të ndalet deri në fund ndërkohë retorika e komunikimit është ashpërsuar.

Në ditën e 15-të të protestës ata shprehen se çështja tashmë ka shkuar për jetë apo vdekje.

“Nuk jemi vetëm shpellarë të qeverisë. Kam ikur gjithçka, ka ose jetë ose vdekje”, u shpreh një nga banorët.

Ndërsa një e moshuar tregoi se ajo kishte kaluar situatë të rëndë psikologjike dhe ishte gati që të vdiste për banesën e saj.

“Na bën përshtypje shumë heshtja e qeveritarëve. Nuk jemi mushkonja, ata kanë ardhur në pushtet nga votat tona. Ne jemi të shqetësuar nga ana psikologjike. Ne po kalojmë parainfarkte. Ne jemi të gatshëm të shtrihemi në mes të rrugës, më mirë të na hedhin një bombë e të vdesim të gjithë. Ne duam shpronësimet”, u shpreh ajo.

Ndërkohë një tjetër banor është i prerë se me trupin e jetën tyre do i mbrojnë banesat:

“Nuk ka asnjë fije transparencë, as nga qeveria as bashkia, ne sikur jemi geto afrikane, jo qytetarë të Tiranës. Edhe avokatja e popullit e nxorri bllof qeverinë në shumë pika. Qeveria edhe mund të na terrorizojë, por ne me trupin e jetën tonë do i mbrojmë banesat,” u shpreh ai.

Protestuestit organizuan sot edhe një marshim senzibilues deri tek rrethotullimi ku në ditët normale të jetesës në Shqipëri, qëndronte “Shqiponja e pavaraësisë”.