Unaza e Re, Protestuesit: Nesër, të gjithë para Parlamentit!
Prania e madhe policisë vazhdoi edhe sonte në protestën e banorëve te Unaza e Re, të prekur nga projekti Unaza e Madhe, ashtu si edhe rritja e numrit të protestuesve dhe përfaqësueve të opozitës. Dhe kur numri shumë i madh i protestuesëve u solidarizua me banorët e Unazë së Re dhe policët u larguan, banorët u shprehën qartë se Sandër Lleshaj është gjeneral i një qeverie të vdekur ndërsa i bënë thirrje të gjithë shqiptarëve që nesër ti bashkohen protestës para Parlamentit të Shqipërisë.
Ish-deputeti i PD, Klevis Balliu, duke falënderuar qytetarët e Tiranës për mbështetjen madhështore ndaj heronjve të Unazës së Re i bëri thirrje çdo qytetari, që nesër të bashkohen të gjithë tek Parlamenti, për t’u rikthyer parlamentin që u ka vjedhur Edi Rama qytetarëve.
“Sot këtu ishin mbledhur me qindra policë, por kur panë qytetarët, kur panë Sovranin që ishte mbledhur këtu, u larguan sepse nuk përballen dot me fuqinë tuaj, dhe siç e treguan sot do ta tregojnë nesër përballë parlamentit. Të gjithë bashkë për t’i treguar kesaj qeverie se kush e ka fuqinë në këtë vend. i bëj thirrje gjeneralit të qeverisë së vdekur, gjeneralit të qeverisë që ka ikur, që të largojë çdo presion, çdo tentativë dhune ndaj këtyre qytetarëve. I bëj thirrje çdo qytetari, që nesër të bashkohemi të gjithë bashkë tek Parlamenti, për t’u rikthyer parlamentin që ka vjedhur Edi Rama qytetarëve, që t’i rikthejmë dinjitetin institucionit të parlamentit”.
Edi Ramës dhe regjimit të tij, tha Ish-Deputetja e PD, Orjola Pampuri, në fjalën e saj para protestuesve, po i vjen fundi.
“Kur çdo diktatori i vjen fundi, mundohet të mbahet me kthetra deri në grahmat e fundit, tha Pampuri, por ne të gjithë bashkë nuk do ta lejojmë më, ne jemi të gjithë bashkë këtu për t’i thënë “largohu”. Ne duam një demokraci evropiane, në fakt një demokraci si ajo e Amerikës, prandaj jemi në rrugë sot, të gjithë bashkë, ndaj protestojmë e ndaj jemi qëndrestarë deri në fund. Ne po u tregojmë ndërkombëtarëve se jemi qytetarë, paqësorë, kemi protestuar paqësisht sa herë kemi dalë në sheshe. Ne jemi qytetarë njësoj si qytetarët në Paris a gjetkë. Sot paradite këtu në Unazën e Re ka qenë Sandër Lleshaj, i cili urdhëron helmet, urdhëron policinë të turret mbi protestuesit. Sandër Lleshaj, Afrim Qendro, Damian Gjiknuri dhe Edi Rama në krye me ta, ta kenë të qartë se ne do të qendrojmë deri në fund, nuk do të largohemi dhe fati që i pret këta është vetëm burgu” paralajmëroi ish-deputetja Oriola Pampuri.
Ish-deputeti Endri Hasa theksoi se qytetarët po protestojnë, por protestuesit e Unazës së Re ishin bërthama e qëndresës.
“Ju jeni njerëzit e lirë që i japin moral këtij vendi, që u japin shembullin e moralit shqiptarëve, prandaj ju të gjithë nesër, së bashku me çdo shqiptar do bashkoheni e do shkoni tek parlamenti i krimit, që t’i themi Edi Ramës që të mos kthehet prej andej nga është degdisur, të mos kthehet këtu e të mos bëjë provë ta irritojë akoma më shumë këtë popull, këtij populi që i ka vjedhur gjithçka Ne jemi me qytetarët e lirë dhe nuk mund të pajtohemi kurrsesi me një parlament krimi, me një parlament që bën gjithçka për të vjedhur këtë popull e që u fal gjithçk oligarkëve”.
Protesta e banorëve te Unaza e Re kundër projektit korruptiv që prish shtëpitë e tyre, sonte u mbështet edhe nga Ish-Deputetët e PD Edmond Spaho, Enkelejd Alibeaj, Gent Strazimiri, Albana Vokshi, Flamur Noka, Endri Hasa, Aldo Bumçi, Florion Mima, Luçiano Boçi, Hekuran Hoxhalli, Fatbardha Kadiu e Bardh Spahia.
