Unaza e Re, Protestuesit: Turp të të vijë deputete Gjylameti, erdhe si qen të na kërkoje vota…

Protesta e  banorëve tek Unaza e Re po shënon ditën e saj të tetë, por siç duket kjo revoltë kundër qeverisë dhe bashkisë së Tiranës nuk është marrë saeriozisht si nga Edi Rama ashtu edhe Erion Veliaj.

Banorët e Tiranës që banojnë në dy krahët e rrugës nga Pallati me Shigjeta deri tek Sheshi Shqiponja, ku mendohet të zhvillohet projekti për zgjerimin e rrugës dhe ku do të shemben 317 godina banimi dhe biznese, deri më sot kanë arritur të bllokojnë vetëm qarkullimin e makinave ndërkohë sot kanë intensifikuar protestën edhe me thirrjet personale të atyre deputetëve socialist që u kanë dhënë votën në këmbim të një premtimi i cili edhe kur është dhënë ishte absurd.

“Ku je deputete Gjylameti?! Ku je?! Erdhe si qen për të na kërkuar vota! Ne e duam rrugën, nuk jemi kundër rrugës, por na dëmshpërblemi 100%. Thjesht mungon vullneti, se kjo mund të bëhet.”

“Ku je, o Avokate e Popullit?! Ku je o Shoqëri Civile?! Ku jeni?!:

Protestuesi me megafon ka njoftuar se protestës së tyre i janë bashkuar sot protestuesit që mbrojnë Teatrin Kombëtar dhe i kanë falënderuar ata.

“Edhe ne do ta mbrojmë Teatrin,” kanë premtuar ata sot duke bërë thirrje me megafon.

Protesta e banorëve të Unazës Re tashmë mbështetet edhe nga opozita ndërsa kryetari i Partisë Demokratike, Lulzim Basha dje takoi edhe protestuesit.