Urgjenca e re 44 ditë jashtë shërbimit, Albana Fico largohet nga detyra e drejtores së QSUT

Urgjenca e Re, si investimi më serioz në Shëndetësi në 30 vitet e fundit, sipas Kryeministrit Edi Rama, ka 44 ditë që nuk funksionon pasi u përfshi nga zjarri më 11 shkurt, arsye kjo që sot detyroi drejtoreshen e Qendrës Spitalore Universitare “Nënë Tereza” në Tiranë, Alban Fico, të largohet nga detyra.

Shërbimi i Urgjencës si pjesë integrale e Spitalit të Ri të Sëmundjeve të Brendshme u mor në dorëzim nga Ministria e Shëndetësisë pak muaj më parë, dhe 44 ditë që nga rënia e zjarrit, qytetarët dërgohen tek Urgjenca e Traumës. 50 deri në 60 raste në 24 orë tek Urgjenca e Traumës kanë vështirësuar dhe punën e Urgjencës.

Ndryshe, investimi për Spitalin e Ri të Sëmundjeve të Brendshme dhe Urgjencës së Re në Qendrën Spitalore Universitare “Nënë Tereza” në Tiranë, ka kushtuar rreth 17 milionë euro. Nga kjo vlerë, më shumë se 11 milionë euro janë shpenzuar për godinën dhe pjesa tjetër për aparatura spitalore.