Urime Ministria e Brendshme, Sandër Lleshaj e bëri një punë!
Pas gjithë asaj demagogjie që shiti para drejtuesëve të policisë me ardhjen në krye të Ministrisë së Brendshme, ish-gjenerali Sandër Lleshaj e bëri më në fund një punë.
Sot ai firmosi dy urdhra për zëvendësime të rëndësishme në radhët e krerëve të Policisë së Shtetit. “Drejtuesi i Lartë, Tonin Vocaj u emërua Drejtor i Departamentit të Policisë Kriminale në Policinë e Shtetit dhe Drejtuesi i Lartë, Eduart Merkaj kaloi si Drejtor i Departamentit për Kufirin dhe Migracionin në Policinë e Shtetit.
Drejtuesi i Lartë, Tonin Vocaj aktualisht pedagog pranë Akademisë së Sigurisë, deri në vitin 2014 ishte në postin e Drejtorit të Policisë Kriminale në Policinë e Shtetit. Në atë kohë u tha se ishte liruar nga detyra nga Drejtori i Përgjithshëm i Policisë, Artan Didi ndonëse ishte vendim i ministrit të Brendshëm, Saimir Tahiri.
Ndërsa Eduart Merkaj i cili aktualisht është Drejtor i Departamentit të Policisë Kriminale në Policinë e Shtetit kalon si Drejtor i Departamentit për Kufirin dhe Migracionin në Policinë e Shtetit.
Nuk dihen arsyet që e bindën ministrin Lleshaj ta kthej Tonin Vocajn në postin që ushtronte në vitin 2014, kur krimi në atë kohë kishte marrë dhen, por shpresojmë që këto dy vendime që bënë ministri i Brendshëm, të mos kalojnë si dy të parat që shumë shpejtë u bënë nul. Dha urdhër për ndalimin e fishekzjarreve për Vitin e Ri, dhe qielli shqiptar u mbush me tym dhe barot në ndërrimin e viteve. Ndërsa mbyllja e pikave të basteve, edhe pse nuk mund të themi se ka dështuar plotësisht, ministri duhet të përgëzohet për diversitetin e reklamave që është krijuar me mbylljen e bizneseve me prapashtesën “lloto”; Dhe, sot Policia që Duam ka sjellë në tregun shqiptar jo zhdukjen por një rilindje të biznesit të basteve: Bastet që Duam!
Njoftimi i Ministrisë së Brendshme
Zëvendësministri i Brendshëm Besfort Lamallari dhe Drejtori i Përgjithshëm i Policisë së Shtetit Ardi Veliu, gjatë një takimi paraditen e sotme me drejtuesit qendrorë të Policisë së Shtetit, kanë bërë të njohur dy urdhra të Ministrit të Brendshëm Sandër Lleshaj. Në bazë të urdhrave të mësipërm, Drejtues i Lartë Tonin Vocaj emërohet Drejtor i Departamentit të Policisë Kriminale në Policinë e Shtetit dhe Drejtues i Lartë Eduart Merkaj emërohet Drejtor i Departamentit për Kufirin dhe Migracionin në Policinë e Shtetit.
