Ursula von der Leyen viziton Ballkanin Perëndimor, në Kosovë më 15 tetor

Presidentja e Komisionit Evropian, Ursula von der Leyen, do të vizitojë rajonin e Ballkanit Perëndimor në mes të muajit tetor.

Vizita e Von der Leyen, sipas burimeve jozyrtare në Komisionin Evropian, do të nisë më 13 tetor, ku do të takohet me udhëheqësit e secilit nga gjashtë shtetet e Ballkanit Perëndimor. Qëndrimi i saj në Prishtinë është paraparë për datën 15 tetor.

Pritet që shefja e Komisionit Evropian të takohet në Prishtinë si me Presidenten e Kosovës, Vjosa Osmani, ashtu edhe me kryeministrin në detyrë, Albin Kurti.

Kjo vizitë e Ursula von der Leyen në Ballkanin Perëndimor do të shërbejë gjithashtu si një rast për të rikonfirmuar perspektivën evropiane për të gjithë Ballkanin Perëndimor.

Planet e Presidentes së Komisionit Evropian, Ursula von der Leyen, për të vizituar kryeqytetet e shteteve të Ballkanit Perëndimor kanë bërë që të shtyhet publikimi i Raportit vjetor të KE, i cili zakonisht publikohet në tetor. Publikimi i këtij dokumenti është shtyrë për fillim të muajit nëntor. Kjo lëvizje duket se synon që vizita të prezantohet si një sukses.