“Ushtar i verbër i partisë”/ Kallëzim penal, Presidenti Ilir Meta kundër kreut të KED, Ardian Dvorani

Presidenti i Republikës, Ilir Meta, ka njoftuar sot se ditën e hënë do të dorëzojë në Gjykatën e Lartë, kallëzimin penal për Kryetarin e Këshillit të Emërimeve në Drejtësi, KED, Ardian Dvoranit.

“Dëshiroj t’ju bëj me dije vendimin tim si presidenti dhe kryetar i shtetit për të paraqitur ditën e hënë kallëzim penal si Presidenti i Republikës kundër zotit Ardian Dvorani me detyrë kryetar i Këshillit të Emërimeve në Drejtësi, kallëzim në Gjykatën e Lartë.

E akuzoj për këto vepra penale:

1.Shpërdorim detyre neni 248 kodit penal

2.Përvetësimi i titullit apo detyrës shtetërore, 246 kodi penal.

Baza ligjore Kushtetuta e Republikës së Shqipërisë, kallëzim përpara Prokurorisë.

Vetëm dy ditë më parë, Presidenti Meta shpërtheu me tone të larta ndaj kreut të Këshillit Emërimeve në Drejtësi, Ardian Dvorani, ndërsa e konsideroi “ushtar të partisë”.

Në një deklaratë për mediat, Presidenti Meta tha se kreu i KED, në kundërshtim me statusin, bën lojëra të tilla që të vendosë në pozitë kreun e Shtetit që të shkelë Kushtetutën me pahir. Në lidhje me listat nuk ishte marrë një vendim kolegjial, por personal i vet Dvoranit.

“Siç jeni bërë me dije, nga debati publik dhe deklaratat publike, është konstatuar se në KED janë kryer disa shkelje të rënda nga Ardian Dvorani, që i kapërcejnë shkeljet ligjore. Veprimet dhe mosveprimet e Dvoranit, sjellin pasoja të pariparueshme në sistemin e drejtësisë. Presidenti i Republikës pasi ka konstatuara këto veprime, vlerëson se ato përbëjnë shkelje disiplinore. Kallëzimi me qëllim fillimin e hetimeve ndaj Dvoranit, dhe përvetësimi i titullit dhe detyrës shtetërore, vlerësohet se ai ka marrë përsipër të realizojë një akt mafioz. Vakanca e dytë e plotë; presidenti i Republikës me dekretin 111.33 vendosi që të shpallë vendin vakant, për shkak të përfundimit të zonjës Altina Xhoxha dhe iu përcoll KED sipas afateve ligjore. Edhe Kuvendi ka përcjell dy vakancat që i takonin atij. KED, i zgjedhur me short ka përmbyllur vlerësimin për 4 vakancat e mësipërme, dy të presidentit dhe dy të Kuvendit. Më pas publikoi listën. Rezultoi se KED renditjen e kandidatëve e ka bërë në mënyrë të njëkohshme, brenda të njëjtës datë (vakancat e Kuvendit dhe të Presidentit).”

Madje dhe numërtimi i fletës, tha Meta, është i alternuar sipas radhës së shpalljes. “KED i cili është organ kolegjial, jo personal, pra askush s’merr dot vendime personale dhe që funksionon në bazë të ligjit 115, në 15 shtator s’ka marrë asnjë vendim. Kryetari i KED i ka përcjellë vet listat në adresë të presidentit, për plotësimin e vakancave të presidentit dhe Kuvendit. Nuk rezultoi që KED në mënyrë kolegjiale të ketë marrë ndonjë vendim për dërgimin e listave pranë organeve të emërtesës, por është kryer vetëm në mënyrë individuale. Është bërë në mënyrë të qëllimshme nga kryetari i KED.”

I gjendur përpara kësaj situate, të administrimin të dy listave njëherësh, Ilri Meta sqaroi se Presidenca iu drejtua KED me një kërkesë, nëse ia kishte përcjellë listën Kuvendit.

“Kryetari i KED informoi presidentin se ka përcjell dhe ka dorëzuar pranë Kuvendit listën përfundimtare dhe raportin e arsyetuar dhe renditur prej tyre. Këshilli i ka miratuar në një ditë dhe zotëria, në vend që të respektojë kronologjinë e Kushtetues, Presidencën ia dërgon më përpara, dhe Kuvendit ia dërgon kur e pyet presidenti. Në datë 14 tetor kryetari i KED ka realizuar procesin e dërgimit të listave në Kuvend.”