Ushtria në Aeroportin e Rinasit, Presidenti Ilir Meta zgjohet nga gjumi…

Një ditë pas vendimit të Ministrisë së Mbrojtjes për të marrë në ruajtje Aeroportin e Rinasit pas grabitjes së armatosur në pistën e aeroportit, dhe dytë pasi u cenua edhe siguria e Zv/Nd.Sekretarit amerikan të Shtetit, Matthew Palmer në Tiranë si përdorues i pak çasteve më vonë të këtij Aeroporti, Komandanti i Përgjithshëm i Forcave të Armatosura, Presidenti i Ilir Meta u zgjua nga gjumi. Jo duke thirrë Këshillin e Sigurisë por duke bërë të ditur se i ka kërkuar informacion Shefit të Shtabit të Përgjithshëm të FA-së, Bardhyl Kollçaku, se kush është baza ligjore të cilës i është referuar për të vendosur efektivët e Policisë Ushtarake dhe Batalionin e Forcave të Armatosura në perimetrin e sigurisë së Aeroportit “Nënë Tereza” dhe më pas do të bëjë reagimin publik.

“Presidenti i Republikës i ka kërkuar zyrtarisht informacion Shefit të Shtabit të Përgjithshëm të FA, Gjeneral Brigade Bardhyl Kollçakut, mbi bazën ligjore të vendosjes së efektivëve të Policisë Ushtarake dhe Batalionit Special të Forcave tona të Armatosura në perimetrin e sigurisë së aeroportit “Nënë Tereza. Pasi të ketë një informacion më të plotë mund të bëjë një reagim publik,” ka sqaruar zëdhënësi i Presidentit të zgjuar nga gjumi, Tedi Blushi.