Ushtria në Aeroportin e Rinasit/ Reagimi, Basha: Akti i fundit antikushtetues i qeverisë ilegjitime…

Dislokimin e Ushtrisë në Aeroportin e Rinasit pas grabitjes së miliona eurove, Kryetari i Partisë Demokratike e konsideron si rënie të shtetit dhe aktin e fundit antikushtetues të qeverisë ilegjitime.

Si njohës i mirë i Ligjit për Forcat e Armatosura duke qenë dhe protagonisti kryesor i anëtarësimit të Shqipërisë në NATO, Lulzim Basha duke konstatuar shkeljen, citon Kushtetutën duke sqaruar si dhe kur mund të përdoren Forcat e Armatosura.

Reagimi i plotë:

Rënia e shtetit dhe akti i fundit antikushtetues i qeverisë ilegjitime, në gërmat e Kushtetutës së Shqipërisë dhe Ligjit për Forcat e Armatosura:

Kushtetuta e Republikës së Shqipërisë 
Neni 173
1. Në rast rreziku për rendin kushtetues dhe për sigurinë publike, Kuvendi, me kërkesë të Këshillit të Ministrave, mund të vendosë në një pjesë ose në të gjithë territorin e shtetit gjendjen e jashtëzakonshme, e cila zgjat për aq kohë sa vazhdon rreziku, por jo më shumë se 60 ditë.
2. Me vendosjen e gjendjes së jashtëzakonshme ndërhyrja e forcave të armatosura bëhet me vendim të Kuvendit dhe vetëm kur forcat e policisë nuk janë në gjendje të rivendosin rendin.
3. Zgjatja e afatit të gjendjes së jashtëzakonshme mund të bëhet vetëm me pëlqim të Kuvendit çdo 30 ditë, për një periudhë jo më shumë se 90 ditë!!

LIGJI I PUSHTETEVE TE DREJTIMIT TE FORCAVE TE ARMATOSURA
Neni 22
Përdorimi i Forcave të Armatosura gjatë gjendjes së jashtëzakonshme
1. Gjendja e jashtëzakonshme vendoset me ligj nga Kuvendi, sipas dispozitave të Kushtetutës së Republikës së Shqipërisë.
2. Me vendosjen e gjendjes së jashtëzakonshme, Forcat e Armatosura, me vendim të Kuvendit, pas kërkesës së Këshillit të Ministrave, mund të ndërhyjnë për rivendosjen e rendit, vetëm kur forcat e policisë nuk janë në gjendje ta kryejnë këtë detyrë.
3. Gjatë gjendjes së jashtëzakonshme Kryeministri është drejtpërdrejt përgjegjës për drejtimin e Forcave të Armatosura, përmes hierarkisë së drejtimit e të komandimit.
4. Pas përfundimit të gjendjes së jashtëzakonshme Kryeministri i raporton Kuvendit për përdorimin e Forcave të Armatosura gjatë kësaj periudhe.
5. Veprimet, që ndërmerren nga Forcat e Armatosura gjatë gjendjes së jashtëzakonshme, duhet të jenë në përpjesëtim me shkallën e rrezikut dhe duhet të synojnë rivendosjen sa më të shpejtë të funksionimit normal të shtetit.