Vaksina anti-covid, Edi Rama: Kemi bërë rezervim! Çipat, fantazi e çmendur e kompetentëve!

Më në fund u shfaq edhe Kryeministri Edi Rama pas më shumë se dy javësh mungese të paparë në të kaluar e tij politike, me një spektakël nga Spitali Infektiv ku kishte renditur mjekët dhe infermierët në vijën e parë të betejës me COVID19.

“Mirënjohje, respekt dhe këmbëngulje së bashku, për të vijuar një përballje unikale në jetën tonë me një virus që ka sulmuar botën dhe na sfidon çdo ditë në jetën e në punën tonë! Do të vazhdojmë pa u lodhur, pa e humbur fokusin dhe toruan, me angazhim maksimal e durim të madh, deri në fund, bluzat e bardha në zjarrin e luftës me vdekjen në trupin e pacientëve, ne në mbështetje të tyre, duke rritur më tej kapacitetet njerëzore e materiale në atë front,” u shpreh Edi Rama duke paralajmëruar që së shpejti do të njoftohen konkretisht edhe për një rritje masive pagash, për të gjithë mjekët dhe infermierët e Shqipërisë.

Me këtë rast Kryeministri tha se qeveria shqiptare ka bërë rezervim për vaksinën e COVID-19 kur ajo të dalë por fillimisht saktësoi se do të financohet vaksinimi falas për vaksinën e gripit sezonal.

”Kemi dhe hapjen e shkollave. Fëmijët janë transmetuesë, nuk janë të imunizuar. Kemi çunin që do të shkojë në klasën e parë, mos tako, mos përqafo, vendoset në një situatë që është komplet e panjohur. Tani duhet t’i themi komplet të kundërtat në shkollë. Ajo që vlen të thuhet është që nuk e kemi zgjedhur, na ka zgjedhur. E di shumë mirë se jemi në kontakt të vazhdueshëm me ministren, se çfarë është bërë kur vjen gripi i stinës. Kemi marrë masat për të rritur kapacitetet vaksinuese, që të lehtësojmë gripin e stinës. Edhe unë që jam komplet jashtë kësaj fushe, një trup vulnerabël e merr më fort goditjen, me vulnerabilitetin që krijon gripi i stinës. Kemi vendosur një financim të konsiderueshëm,” tha Edi Rama duke saktësuar masat për vaksinën anti-covid:

“Kemi bërë rezervim për vaksinën kur do të dalë. Pa llogaritur kompetentët e Facebook, që flasin për çipa, që do ju përgjojnë ku do shkojnë, çfarë do bëjnë, që janë fantazi e çmendur.”

Lajm i mirë nga Infektivi

Me këtë rast Kryeministri Edi Rama premtoi një rritje të konsiderueshme pagash për të gjithë mjekët dhe infermierët, që prej muajsh po përballem me koronavirusin, në vijën e parë të betejës.

“Duam të realizojmë një rritje të konsiderueshme pagash, jo 5 apo 7%. Do bëjmë një rritje pagash të konsiderueshme, ende po kalkulojmë për shumën. Përtej bonuesit 1 mijë euro, që ju si në vijën e parë do t’i merrni deri në fund, do të jeni në një nivel në mesataren e lartë të rajonit. Këtë duam ta bëjmë fakt në fillim të vitit të ardhshëm. Me të filluar viti të gjithë ju të keni një rritje në pagë. Është një objektiv i detyruar,” tha Kryeministri Edi Rama duke shtuar:

“Ne kemi ndërmarrë masa të caktuara, që të mos i lëmë mjekët të largohen. E vërteta është se largimi ka rënë ndjeshëm. Mesa kemi kuptuar, mjekët qëndrojnë jo nga halli, por shohin si mundësi të arsyeshme ta fillojnë këtu karrierën”

Për të gjithë ata që janë trembur nga një valë e dytë nga COVID-19 Kryeministri Edi Rama kishte një lajm të mirë ndërsa pranoi se nuk mund të ketë një tjetër mbyllje dhe izolim të Shqipërisë në vjeshtë.

Ndërkohë që virusi ju e keni thënë, nuk ka ardhur për të ikur as për 3 javë, as për 4 javë as për 4 muaj për një periudhë që askush nuk e di sa do të zgjasë. Nuk ja bëjmë dot ndryshe. Nuk zgjedhim dot mbylljen dhe izolimin si opsion të vazhdueshëm, sjell dëme dhe shkatërrime të tjera. Jo vetëm në aspektin ekonomik por edhe social.”