Vaksina Anti-covid, OBSH: Në treg nuk e presim para Qershorit 2021!

Organizata Botërore e Shëndetësisë, nuk pret që vaksina Anti-covid të shpërndahet para qershorit të vitit 2021, tha sot zëdhënësja e OBSH, Margaret Harris, duke shtuar se është me rëndësi verifikimi i rreptë i efikasitetit dhe sigurisë së vaksinës.

Deri më tani, tha Harris, asnjëra nga vaksinat e mundshme në studimet klinike nuk ka treguar një sinjal të qartë mbi efikasitetin, të paktën prej 50 për qind të kërkesave të OBSH.

“Ne vërtetë nuk presim shpërndarjen e vaksinës para mesit të vitit të ardhshëm,” tha Harris para gazetarëve në Gjenevë duke sqaruar se faza e tretë duhet të zgjasë më shumë sepse duhet të verifikojmë se sa të mbron vaksina dhe sa e sigurt është.  

OBSH dhe GAVI janë përgjegjës për planin global të shpërndarjes së vaksinës i njohur si COVAX. Në fokus është vaksinimi i personave me rrezikshmëri të lartë në të gjitha vendet, siç janë punëtorët shëndetësorë.

COVAX planifikon të shpërndajë 2 miliardë vaksina të miratuara deri në fund të vitit 2021, por disa shtete të cilat kanë siguruar vaksinën për nevojat e tyre me marrëveshje dypalëshe, duke përfshirë dhe SHBA-në,  kanë refuzuar ti bashkohen këtij projekti.

Ndryshe, në muajin gusht, Rusia ka miratuar vaksinën kundër COVID-19, pas më pak se dy muaj testimi në njerëz, arsye kjo që ekspertët perëndimor e vunë në dyshim efikasitetin e vaksinës.

Zyrtarët shëndetësor amerikanë dhe Pfizer dje theksuan se vaksina do të jetë gati deri në fund të muajit tetor, para zgjedhjeve presidenciale në SHBA më 3 nëntor, ku pritet që çështja e pandemisë së koronavirusit të jetë dhe një faktor i rëndësishëm për vendimin e votuesve.