Vaksina e Oxfordit nxitë imunitet të fortë tek 60-70 vjeçarët
Vaksina e Oxfordit kundër koronavirusit ka nxitur një përgjigje të fortë imunitare tek personat 60-70 vjeç, që jep dhe shpresë se mund ti ofroj një mbrojtje të mirë grupeve më të rrezikuara nga COVID-19.
Shkencëtarët që po punojnë në zhvillimin e kësaj vaksine u shprehën se rezultatet e fazës së dytë të hulumtimeve klinike, e cila është kryer tek 560 vullnetarë janë inkurajuese dhe se në fazën e tretë tashmë po testohet nëse vaksina mund të parandaloj infektimin me koronavirus. Rezultatet paraprake të fazës së tretë të hulumtimit klinik do të publikohen në javët në vijim.
Nuk ka efekte anësore të rëndësishme
Pjesëmarrësit në fazën e dytë të hulumtimit kanë marrë dy doza të vaksinës së Oxfordit ose placebo.
“Të tre grupmoshat (18-55, 56-79 dhe 70+) që kanë marrë vaksinat kishin nivele të ngjashme të antitrupave neutralizues dhe reagime në qelizat T,” theksojnë shkencëtarët që punojnë në këtë vaksinë duke shtuar se gjatë hulumtimit nuk janë shënuar kurrfarë probleme shëndetësore, përkatësisht efekte anësore, raporton Sky News.
Dy javë pas dozës së dytë, më shumë se 99 për qind e pjesëmarrësve kishin antitrupa neutralizues. 14 ditë pas dozës së parë të vaksinës, është shënuar kulmi i reagimit të qelizave T, një masë e mirë e reagimit të sistemit imunitar. Deri më tani për tre vaksinat – Pfizer-BioNTech, Sputnik dhe Moderna – janë publikuar rezultate inkurajuese për fazën e tretë të hulumtimeve klinike. Britania e Madhe tashmë ka porositur 100 milionë vaksina Oxford, që i prodhon kompania AstraZeneca, 40 milionë vaksina Pfizer-BioNTech dhe pesë milionë vaksina Moderna.
Ndryshe, Komisioni Evropian ka porositur vaksina anticovid nga gjashtë kompani, njëra prej të cilave është vaksina që po zhvillohet nga shkencëtarët e Oxfordit së bashku me kompaninë AstraZeneca. Kjo kompani britanike, për shtetet anëtare të Bashkimit Evropian do të siguroj 300 milionë vaksina. Çmimi i një vaksine Oxford është 10 euro për dy doza. Prioritet në vaksinim do të jenë të moshuarit mbi 65 vjeç, të punësuarit në sistemin shëndetësor dhe ata në azile të pleqve.
Problemi me sistemin imunitar tek të moshuarit
Gjatë zhvillimit të vaksinës, shkencëtarët e kanë për detyrë të garantojnë se ajo do të veproj edhe tek të moshuarit. Në fakt, vaksinat kanë të tendencë të nxisin reagime më të mira tek të rinjtë për shkak të sistemit më të dobët imunitar tek të moshuarit, raporton BBC.
Por rezultatet e hulumtimit të Universitetit Oxford, të publikuara në revistën The Lancet, tregojnë se ky nuk do të jetë problem me vaksinën e tyre dhe se personat e moshës prej 56-69 vjeç si dhe ata mbi 70 vjeç, kishin përgjigje të ngjashme imunitare si ata nën moshën 55 vjeç.
“Na erdhi mirë të shohim se personat e moshuar jo vetëm kanë reaguar mirë ndaj vaksinës por kishin përgjigjen e ngjashme imunitare ashtu si moshat e reja. Hapi i radhës është testimi nëse përgjigja imunitare do të jetë e mjaftueshme si mbrojtje nga infektimi me COVID-19,” tha infektologia Dr.Maheshi Ramasamy nga grupi i Oxfordit për vaksinë.
