Vaksina kundër COVID-19, Vjosa Osmani: Në Kosovë, pas muajit prill!

Do të kërkojë përgjegjësi nga Qeveria pse Kosova nuk është e përgatitur për vaksinim, tha Ushtruesja e detyrës së Presidentit, Vjosa Osmani, ndërsa e pranoi se vaksinat pritet të vijnë pas muajit prill.

“Unë kam diskutuar me një numër të madh të parterëve ndërkombëtarë që kanë ofruar ndihmën e tyre. BE e ka futur Kosovën në COVAX. Mendoj që kemi vonesa që nuk do të duhej të arsyetoheshin. Ne do të kërkojmë përgjegjësi nga Qeveria se pse ne nuk jemi të përgatitur. Pritet që vaksinat të vijnë dikur tek pas prillit. Edhe pse e kam kaluar virusin unë do të vaksinohem me të,” tha Vjosa Osmani ndërsa vaksinimin e qytetarëve serb në veri të Kosovë nga ana e Serbisë e konsideron shkelje të marrëveshjeve që janë nënshkruar në Bruksel në mes Kosovës dhe Serbisë, që dëshmon se Serbia në atë proces është vetëm nënshkruese por kurrë zbatuese e premtimeve që jep.

“Ne jemi njoftuar që institucionet e drejtësisë janë duke e hetuar rastin. Kjo jo vetëm që është shkelje flagrante e marrëveshjeve që janë nënshkruar në Bruksel në mes të Kosovës dhe Serbisë përgjatë procesit të dialogut që ka zgjatur me vite të tëra, dhe e dëshmon se Serbia në atë proces është vetëm nënshkruese por kurrë zbatuese e premtimeve që i jep,” tha Presidentja e Kosovës duke shtuar se nisja e vaksinimit Anticovid tregon edhe një mungesë përgatitjeje nga institucionet e Kosovës.

“Por në anën tjetër tregon edhe një mungesë përgatitje nga institucionet tona në mënyrë që të gjithë qytetarët, përfshirë veriun e vendit të njoftohen se kur duhet t’i presin ata vaksinat nga institucionet shtetërore të Kosovës. Përderisa mungon një informatë e tillë dhe një bashkërendim i tillë natyrisht që Serbia e shfrytëzon çdo hapësirë dhe çdo vakum të tillë për të destabilizuar vendin. Sepse ata edhe kur e përdorin këtë si argument kinse për mbrojtje të qytetarëve ne fakt po e shfrytëzojnë për destabilizim të situatës, të sigurisë por edhe politik qe pastaj mund të ketë pasoja me të mëdha,” tha Vjosa Osmani duke këruar përgjegjësi për ata që kryen vaksinimin në këtë mënyrë:

“Personat që e kanë kryer krejt ketë proces në mënyrë ilegale duhet të përgjigjen, mirëpo duhet një politikë shumë me proaktive e institucioneve tona, e qeverisë sonë e jo vetëm të jenë reaktiv ndaj asaj çfarë ndërmerr Serbia. Duhet një bashkëpunim me të gjitha komunat e vendit përfshirë komunat në veri në mënyrë qe institucionet tona të zgjedhura të informojnë secilin qytetar se si do të realizohet procesi i vaksinimit.”