Vaksina Oxford/AstraZeneca miratohet për përdorim

Vaksina kundër koronavirusit, e krijuar nga shkencëtarët e Univeristetit të Oxfordit, është miratuar për përdorim në Mbretërinë e Bashkuar.

Kjo shënon një pikë të madhe kthese, që do të çojë në zgjerimin e fushatës së imunizimit, raporton BBC.

Mbretëria e Bashkuar ka porositur 100 milionë doza nga prodhuesi AstraZeneca – të mjaftueshme për vaksinimin e 50 milionë njerëzve.

Miratimi nga rregullatorët mjekësorë nënkupton se vaksina është edhe e sigurt, edhe efektive.

Vaksina Oxford/AstraZeneca është krijuar në muajt e parë të këtij viti, është testuar te vullnetari i parë në muajin prill dhe që atëherë ka kaluar nëpër prova klinike në shkallë të gjerë, që kanë përfshirë mijëra njerëz.

Qysh më 8 dhjetor, mbi 600.000 njerëz janë vaksinuar në Mbretërinë e Bashkuar me vaksinën e kompanive Pfizer dhe BioNTech.

Por, vaksina Oxford/AstraZeneca, raporton RFE, do të çojë në rritje të konsiderueshme të vaksinimit pasi është e lirë dhe prodhohet lehtë në masë. Ajo mund të ruhet në frigorifer standard, ndryshe nga Pfizer/BioNTech që ka nevojë për ruajtje në temperaturë ultra të ftohtë: -70 gradë Celsius.