Vala e re e të nxehtit, alarm i kuq në 16 qytete në Itali
Meteoalarmi i kuq është aktivizuar në 16 qytete në Itali, sepse i nxehti ekstrem vazhdon të godas jugun e Evropës. Janë alarmuar në veçanti vatrat turistike në Romë, Firence dhe Bolonjë, për ditët në vijim, që flasin për rrezik edhe për njerëzit që nuk janë fare të sëmurë.
Temperatura ekstreme të larta priten në Evropë gjatë javës së ardhshme me një valë të re të nxehtit.
Agjencia Hapësinore e Evropës, ESA, thotë se Italia, Spanja, Franca, Gjermania dhe Polonia mund të arrijnë temperatura maksimale të larta.
Temperatura më e madhe që është shënuar në Evropë ishte 48.8 °C në gushtin e vitit 2021 në Sicili, dhe po ky nivel pritet edhe gjatë javës së ardhshme.
Në Itali ekziston frika edhe për rritjen e rrezikut nga zjarret, në veçanti në zonat me erëra të forta.
Periudhat e nxehtësive intensive shfaqen brenda modeleve natyrale të motit, por në rang global janë gjithnjë e më të shpeshta, intensive dhe zgjasin më shumë për shkak të ngrohjes globale.
Qeveria e Italisë ka këshilluar të gjitha rajonet që janë përfshirë nën alarmin e kuq që ti shmangen rrezeve direkte të diellit nga ora 11:00 deri në orën 18:00, dhe të kenë kujdes në veçanti personat e moshuar ose ata që janë të sëmurë.
Ndërkohë, Greqia në ditët e fundit ka shënuar temperaturën prej 40 °C. Akropoli, atrakcioni më i madh turistik është mbyllur gjatë orëve të pikut të vapës, për të mbrojtur vizitorët.
Në vend mbretëron frika e rrezikut më të madh nga zjarret, në veçanti në zonat me erëra të forta, duke pasur parasysh dëmet nga zjarret në vitin 2021, kur ishte një valë e fortë e të nxehtit.
Temperaturat e larta kanë përfshirë edhe pjesët e Evropës qendrore, e ndër vendet e goditura janë Gjermania dhe Polonia.
Shërbimi Meteorologjik i Çekisë në alarmin e lëshuar flet për një fundjavë të nxehtë ku temperaturat mund të arrijnë deri në 38 °C, që është jashtëzakonishte e lartë për këtë vend.
Në Britaninë e Madhe, megjithatë, sot priten reshje shiu dhe erëra të forta në disa pjesë të Anglisë.
Meteorologët italianë parashikojnë se vala e re të nxehtit e quajtur, Haron, i cili sipas mitologjisë greke i dorëzonte shpirtërat në botën nëntokësore, do të rris sërish temperaturat mbi 40 °C gjatë javës së ardhshme.
Vala e të nxehtit do të godas Shtetet e Bashkuara, Kinën, Afrikën e Veriut dhe Japoninë.
Njerëzit këshillohen të konsumojnë të paktën dy litra ujë në ditë, dhe ta shmangin kafen dhe alkoolin, që shkaktojnë dehidrim.
Muaji i kaluar ishte qershori më i nxehtë deri më tani, sipas të dhënave të shërbimit evropian për vëzhgimin e klimës, Copernicus.
Moti ekstrem si rezultat i ngrohjes globale “për fat të keq po bëhet një normalitet i ri”, paralajmëron Organizata Botërore Meteorologjike, WMO.
